Самарқанд яке аз вилоятҳои бузургтарини ҷумҳурӣ аз рӯи шумораи аҳолӣ ва суръати афзоиши он ба ҳисоб меравад. Ин маънои онро дорад, ки эҳтиёҷот ба манзил, инфрасохтор, ҷойҳои корӣ, маориф ва тандурустӣ рӯ ба афзоиш аст. Дар ҳашт соли охир дар вилоят 1 132 бинои истиқоматии бисёрошёна сохта шуда, шароити зисти 56 ҳазор оила беҳтар гардид. Сатҳи фарогирии таҳсилоти томактабӣ аз 21 то 73 фоиз ва таҳсилоти олӣ аз 10 то 45 фоиз баланд шуд.
Дар иқтисодиёт соҳаҳои саноати нассоҷӣ, металлургия, бахши электротехникӣ, истеҳсоли масолеҳи сохтмон ва сайёҳӣ босуръат рушд доранд. Иҷрои лоиҳаҳои калон, сохтмон ва фароҳам овардани ҷойҳои кори сердаромад эътимоди аҳолиро ба фардои беҳтар таҳким мебахшад.
Сатҳи камбизоатӣ дар вилоят аз аввали сол аз 7,5 то 6,9 фоиз коҳиш ёфт. То охири сол нақша гирифта шудааст, ки 150 ҳазор нафар бо кор таъмин шаванд ва 90 ҳазор шаҳрванд аз камбизоатӣ бароварда шаванд.
Дар ҳашт соли охир ҳаҷми истеҳсоли маҳсулоти саноатӣ дар вилоят 1,7 маротиба афзуда, аз 45 триллион сӯм гузаштааст. Аммо 37 фоизи ин ҳаҷм ба шаҳри Самарқанд ва 23 фоиз ба ноҳияҳои Ҷомбой, Самарқанд ва Ургут рост меояд. Ҳамзамон, дар ноҳияҳои Қушработ, Пойрик ва Нураобод саноат суст инкишоф ёфтааст.
Бо ташаббуси Президент дар вилояти Самарқанд ситоди ислоҳот таъсис ёфтааст. Дар ҷараёни пешниҳоди лоиҳаҳо маълумот дар бораи тарҳҳои нав, ки бар асоси пешниҳодҳои соҳибкорон таҳия шудаанд, ироа гардид.
Аз ҷумла, дар ноҳияи Нуробод пешниҳод шудааст, ки минтақаи махсуси саноатӣ дар масоҳати 115 гектар ташкил гардад. Дар ин ҷо иҷрои лоиҳаҳои сармоягузорӣ ба маблағи 472 миллион доллар ва офаридани 1 200 ҷойи кор ба нақша гирифта шудааст. Дар ноҳияи Қушработ як сармоягузори чинӣ ният дорад 40 миллион долларро ба истихроҷ ва коркарди санги гранит равона созад.
Соҳибкор аз Булунғур озмоишгоҳи in vitro ташкил карда, ба ташкили бренди картошкаи тухмӣ оғоз намудааст. Дар ҳамин ноҳия сохтмони корхонаи биофарматсевтӣ бо арзиши 100 миллион доллар ба нақша гирифта шудааст.
Дар маҷмӯъ, дар вилоят 14 лоиҳаи нав ба маблағи 1 миллиарду 200 миллион доллар омода шудааст. Иҷрои онҳо имкон медиҳад, ки 12 ҳазор ҷойи корӣ таъсис дода шавад ва даромади содиротӣ ба ҳаҷми 82 миллион доллар таъмин гардад.
Президент ин ташаббусҳоро дастгирӣ намуда, барои зудтар амалӣ намудани лоиҳаҳо дастурҳо дод. Ӯ зарурати афзоиши баробари ҷолибияти сармоягузорӣ ва иқтидори содиротии ҳар як шаҳру ноҳияро таъкид кард.
