Низомнома тартиби анҷом додани амалҳои нотариалиро аз ҷониби нотариусҳо ба таври фосилавӣ дар низоми видеоконфронсалоқа дар ҳолатҳое муайян менамояд, ки намояндаи шахси воқеӣ ё ҳуқуқӣ ба идораи нотариалӣ ҳозир намешавад.
Тибқи Низомнома, амалҳои нотариалӣ дар низоми видеоконфронсалоқа тавассути портали иттилоотии «E-notarius.uz» ва низоми иттилоотии автоматикунонидашудаи «Notarius» тасдиқ карда мешаванд.
Дархосткунанда барои анҷом додани амали нотариалӣ дар низоми видеоконфронсалоқа бо шартҳои истифодаи шабакаи электронӣ шинос шуда, розигии худро тасдиқ мекунад.
Дархосткунанда дар шабакаи электронӣ номгӯи амали нотариалиро, ки мехоҳад тасдиқ карда шавад, ба таври возеҳ нишон дода, маълумоти заруриро пур мекунад.
Нотариус муроҷиати воридшударо дар муҳлати як рӯзи корӣ аз лаҳзаи ворид шуданаш меомӯзад ва дар бораи мавҷуд ё набудани камбудиҳо огоҳинома мефиристад.
Дар ҷараёни муошират бо нотариус дар маҳалли ҳузури ҷонибҳои амали нотариалӣ набудани шахсони бегона ҳатмӣ буда, утоқ бояд равшан ва аз садо ҳифзшуда бошад, инчунин тасвири видеоӣ бояд равшану дақиқ бошад.
Пас аз он ки лоиҳаи амали нотариалӣ барои имзо омода мегардад, нотариус ба ҷонибҳо ҳуқуқу уҳдадориҳо, моҳият ва оқибатҳои амали нотариалии анҷомшавандаро шарҳ медиҳад.
