Бо мақсади ба роҳ мондани ҳаракати қатъии автобусҳои дохилишаҳрӣ ба Гулистон 52 адад автобус расонида шуд. Онҳо пурра ба талаботи стандарти экологии “Евро-5” ҷавобгӯ буда, бо гази фишурдашудаи табиӣ фаъолият мекунанд.

Ин воситаҳои нақлиёт барои интиқоли 65 мусофир пешбинӣ шуда, шароити бароҳат фароҳам меоранд — автобусҳо пастфарш мебошанд ва бо пандусҳои махсус ва ҷойҳои нишасти ҷудогона барои шахсони дорои имконияти маҳдуд муҷаҳҳазанд. Барои пардохти роҳкирӣ истифодаи низоми электронии «АТТО» пешбинӣ шудааст.

Бо дарназардошти ниёзҳои аҳолӣ ба нақлиёти ҷамъиятии шаҳрӣ, дар асоси шартномаи брутто ҳаракати автобусҳо дар 7 хатсайри дохилишаҳрӣ роҳандозӣ гардид, ки 23 маҳаллаи шаҳри Гулистонро пурра фаро мегирад.

Ин иқдом имкон медиҳад, ки фосилаи ҳаракати автобусҳо ду баробар кам шуда, ба 29 ҳазор сокини шаҳр хизматрасониҳои бароҳат, бехатар ва дастрас пешниҳод гардад.

Натиҷаи муҳими дигар он мебошад, ки дар як сол дар доираи ҳаракати навшуда хизматрасониҳои нақлиётӣ ба маблағи 38 миллиард сӯм анҷом дода шуда, инчунин 120 ҷойи нави корӣ таъсис меёбад.

Сарвари давлат супориш дод, ки корҳо ҷиҳати пайдарпай такмил додани парки нақлиёти ҷамъиятии шаҳрҳои кишвар бо автобусҳои муосир ва расонидани хидматрасониҳои босифат ба аҳолӣ идома дода шаванд.

Ҳамчунин дар ҳамин ҷо иттилоъ дода шуд, ки дар оянда харидории боз 30 автобуси 11-метра барои сафарҳои масофаи дур дар назар аст. Татбиқи ин лоиҳа имкон медиҳад, ки беш аз 150 ҷойи иловагии корӣ таъсис ёбад.