Дар ин бора Созмони умумиҷаҳонии тандурустӣ (СУТ) хабар дода, даъват кардааст, ки ин рақамҳо "боэҳтиёт" арзёбӣ шаванд ва хатари паҳншавии вабо дар саросари ҷаҳонро "хеле баланд" арзёбӣ кунанд. Аксари ҳолатҳои ин беморӣ дар моҳи март дар Африқо ва Баҳри Миёназамини Шарқӣ ба қайд гирифта шудаанд.

СУТ дар моҳи январ афзоиши ҳодисаҳои глобалии ваборо ҳамчун ҳолати фавқулоддаи дараҷаи 3 тасниф кард, ки дараҷаи баландтарини шиддат аст. "Бо дарназардошти шумораи хуруҷи беморӣ дар саросари ҷаҳон ва тақсимоти ҷуғрофии онҳо ва бо назардошти норасоии ваксинаҳо ва дигар захираҳо, СУТ бори дигар хатари глобалиро [аз моҳи март] хеле баланд арзёбӣ кард" – гуфта мешавад дар варақаи иттилоотӣ.

Ин созмон изҳор дошт, ки дар ҷаҳон "норасоии шадиди ваксинаҳои даҳонӣ бар зидди вабо" идома дорад. Аз январи соли 2023 то моҳи марти соли 2024 шумораи дархостҳои фаврӣ барои чунин ваксинаҳо якбора афзоиш ёфт: 14 кишвар 79 миллион воксин дархост карданд, дар ҳоле ки то 15 апрел захираи ҷаҳонии ваксинаҳои зидди вабо 2,3 миллион воксинро ташкил медиҳад.

Аз 1 январи соли 2023 то 31 марти соли 2024 ба Созмони умумиҷаҳонии тандурустӣ 824 479 ҳолати вабо ва 5 900 фавт иттилоот расидааст. Дар ин муддат хуруҷи ин беморӣ дар ҳама минтақаҳо ба ҷуз аз Аврупо ба қайд гирифта шудааст. Дар соли 2022 дар саросари ҷаҳон 472 697 нафар ва дар соли 2021 223 370 ҳолати гирифторӣ ба ин беморӣ ошкор шудааст.