Сохтмони ин шаҳр соли 2023 оғоз ёфт, имрӯз бошад, биноҳои аввалин аллакай бунёд гардидаанд. Барои татбиқи нақшаҳои бузург дар ноҳияҳои Юқоричирчиқ ва Ӯртачирчиқ 19,7 ҳазор гектар замин ҷудо шудааст. Консепсияи лоиҳа аз ҷониби ширкати бритониёии Cross Works таҳия шудааст.

Дар марҳилаи аввал сохтмон дар масоҳати 6 ҳазор гектар оғоз гардида, дар он ҷо барои зиндагии 600 ҳазор нафар шароити муосир фароҳам оварда мешавад. Дар оянда шаҳр барои 2 миллион нафар аҳолӣ пешбинӣ шудааст. Ин рақамҳо ба таври равшан миқёси лоиҳаро нишон медиҳанд. Аз ин рӯ, ба сифати баланд ва устувории инфрасохтор таваҷҷуҳи хоса дода мешавад. Ҳоло сохтмони коммуникатсияҳои зеризаминии муҳандисӣ: коллекторҳое, ки аз онҳо қубурҳои гармидиҳӣ ва об, шабакаҳои барқ ва телекоммуникатсия гузаронда мешаванд, фаъолона идома дорад. Ҳамчунин, барои роҳати ҳаракати нақлиёт нақбҳо ва таваққуфгоҳҳои зеризаминӣ сохта мешаванд.

Дар ҳар як лоиҳа ба қарорҳои муосир ва экологӣ таваҷҷуҳ дода шудааст. Дар шаҳр нақлиёти аз ҷиҳати экологӣ тоза ҷорӣ гардида, ҳамгироии метро ва электробусҳо ба роҳ монда мешавад. Барои пиёдагардон ва велосипедронҳо шароити қулай ва бехавф муҳайё мегардад.

Дар минтақаи маъмурӣ сохтмони зиёда аз 60 бино барои мақомоти давлатӣ пешбинӣ шудааст. Имрӯз аллакай беш аз даҳ вазорату идора фаъолияти худро дар иншооти муваққатии ҳудуди Тошканди Нав оғоз кардаанд.

Ба Президент инчунин нақшаҳо барои истиқболи наздик муаррифӣ гардиданд. Ба ин лоиҳа бисёре аз сармоягузорони дохилӣ ва хориҷӣ таваҷҷуҳ зоҳир менамоянд. Тибқи натиҷаҳои музоядаҳо аллакай ба маблағи 554 миллион доллар оид ба 13 лоти тиҷоратӣ шартномаҳои сармоягузорӣ ба имзо расидаанд. Дар ин ҷо меҳмонхонаҳо, тарабхонаҳо ва биноҳое бо меъмории хос пайдо мешаванд, ки на танҳо хизматрасонии босифатро таъмин мекунанд, балки шаҳрро ба маркази нави туризм табдил медиҳанд.

Сохтмон имкон медиҳад, ки 160 ҳазор нафар бо ҷойи корӣ таъмин шаванд ва дар оянда дар шаҳр садҳо ҳазор ҷойҳои доимии корӣ, ки ба технологияҳои инноватсионӣ асос ёфтаанд, таъсис дода мешаванд. Барои ин рушду такомули кластерҳои таълимӣ ва тиббӣ, хидматҳои IT ва технопаркҳо ба нақша гирифта шудааст.

Сарвари давлат оид ба ҷалби сармояҳо, инчунин оид ба ташкил кардани минтақаҳои бароҳати истироҳатӣ ва хидматрасонӣ тавсияҳо дод.