2018-yilda BMT Bosh Assambleyasi 20-mayni Butunjahon asalarilar kuni, deb e'lon qilgan. Har yili ushbu sana keng jamoatchilikning e'tiborini asalarilar va boshqa changlatuvchilarning inson va sayyoramiz sog'lig'ini saqlashda tutgan muhim o'rni hamda bugungi kunda ular duch kelayotgan ko'plab tahdidlarga qaratish imkonini beradi.
Bu yil Butunjahon asalarilar yili nihoyatda murakkab ko'plab mamlakatlar COVID-19 pandemiyasining oqibatlari bilan keng miqyosli kurashni davom ettirayotgan tarixiy bir davrda nishonlanmoqda. Uning maqsadi — atrof-muhitni tiklash va changlatuvchilarni himoya qilishga e'tibor bergan holda, COVID-19 pandemiyasi sabab bo'lgan oziq-ovqat xavfsizligi va qishloq xo'jalik sohasidagi turmush kechirish manbalariga bo'layotgan tahdidlarga qarshi kurashish bo'yicha global hamkorlik va birgalikdagi sa'y-harakatlarga ko'maklashishdir.
FAOning O'zbekistondagi vakolatxonasi “O'zbekiston asalarichilari” uyushmasi bilan birgalikda qishloq aholisining turmush darajasini yaxshilashga qaratilgan “Asalarichilikni barqaror rivojlanishini qo'llab-quvvatlash” Texnik hamkorlik dasturini amalga oshirmoqda. Shu bilan birga, Dastur O'zbekiston Prezidentining “Respublikamizda asalarichilik tarmog'ini yanada rivojlantirish chora-tadbirlari to'g'risida”gi Qarorini amalga oshirilishiga ham katta hissa qo'shadi.
— Ushbu Dasturni amalga oshirishda O'zbekistonda asalarichilik sohasiga innovatsiyaviy texnologiyalarni joriy etish, yangi uskunalarni yetkazib berish, asalarichilik bo'yicha mutaxassislarni tayyorlashga qaratilgan ta'lim muassasalarining salohiyatini oshirish, shuningdek, darsliklarni tarjima qilish, chet ellik mutaxassislar bilan hamkorlikni rivojlantirish bizning asosiy vazifalarimiz qatorida turadi”, — deydi FAO ning O'zbekistondagi vakili o'rinbosari Sherzod Umarov. — Bundan tashqari, Dastur doirasida asalarichilar uchun innovatsion axborot almashish tizimi ham ishlab chiqilgan.
Bu asalarichilar barcha zarur ilmiy va statistik axborotlar, shuningdek asalari koloniyalarining joylashuvi to'g'risidagi ma'lumot va pestitsidlardan foydalanish to'g'risida erta ogohlantirishni o'z ichiga olgan mobil ilovadir. Ta'kidlash joizki, Dasturni amalga oshirish jarayonida O'zbekistondagi asosiy asalarichilik mahsulotlarining qo'shimcha qiymat zanjirlarini o'rganishda gender tahliliga ham e'tibor qaratiladi.
Butunjahon asalarilar kuni hukumatlar, tashkilotlar, fuqarolik jamiyati vakillari va barcha fuqarolarga changlatuvchilar va ularning yashash joylarini himoya qilish, ularning soni va xilma-xilligini oshirish, shuningdek, asalarichilarga yordam ko'rsatish va asalarichilik sohasini barqaror rivojlantirish bo'yicha chora-tadbirlarni kuchaytirish imkoniyatini beradi. Asalarilar va asalarichilik tabiat va qishloq xo'jaligida muhim rol` o'ynaydi, qishloq joylarida yashash va munosib ish bilan ta'minlash manbai hisoblanadi, oziq-ovqat xavfsizligini mustahamlash va ovqat sifatini yaxshilashga hissa qo'shadi.
