Oʻzbekiston va BMT oʻrtasidagi hamkorlikning bugungi holati va uni rivojlantirish istiqbollari muhokama qilindi. Xususan, mamlakatimiz bilan Tashkilotning Terrorizmga qarshi kurashish boshqarmasi oʻrtasidagi hamkorlikning asosiy yoʻnalishlari koʻrib chiqildi.
Taʼkidlanganidek, Oʻzbekiston soʻnggi yillarda BMTning terrorizm va ekstremizmga qarshi kurashish masalalari boʻyicha ixtisoslashgan tuzilmalari bilan faol hamkorlik qilib kelyapti va bu boradagi asosiy universal huquqiy hujjatlarning ishtirokchisi hisoblanadi.
Oʻzbekiston tomonining tashabbusi bilan BMT Bosh Assambleyasining 4 ta rezolyutsiyasi qabul qilindi. Oʻtgan yili Oʻzbekiston ilk bor Inson huquqlari boʻyicha Kengashga aʼzo boʻldi, unda mamlakatimiz vakili 2022-yilga rais oʻrinbosari etib tayinlandi.
Tomonlar, shuningdek, Oʻzbekiston Respublikasining Birlashgan Millatlar Tashkilotiga aʼzo boʻlganining 30 yilligi (1992-yil 2-mart) munosabati bilan oʻzaro tabriklar almashdilar, deb xabar beradi Tashqi ishlar vazirligi matbuot xizmati.