Bu haqda Washington Post nashri 2-aprel, chorshanba kuni o'z manbalariga tayanib xabar berdi.

“Bu keng miqyosli xalqaro noroziliklarga qaramay, Prezident Donald Trampning Daniya hududini sotib olish istagini samarali siyosatga aylantirishga qaratilgan eng aniq urinishdir”, deyiladi maqolada.

AQSh rasmiylari Grenlandiyani AQSh hududiga aylantirishning moliyaviy oqibatlarini, shu jumladan uning 58 ming aholisiga davlat xizmatlarini ko'rsatish xarajatlarini aniqlash uchun so'nggi haftalarda choralar ko'rgani aytiladi.

Ikki nafar suhbatdoshning aytishicha, Oq uy byudjeti xodimlari Grenlandiya sotib olingan taqdirda uni saqlab turish qanchaga tushishi mumkinligini aniqlashga harakat qilmoqda. Shuningdek, ular orolning tabiiy resurslari AQSh byudjetiga qancha daromad keltirishini taxmin qilishga harakat qilmoqda.

O'rganilayotgan variantlardan biri Grenlandiya hukumatiga Daniya taklif qilayotganidan yaxshiroq shartnoma taklif qilishdir, hozirda mazkur mamlakat oroldagi xizmatlarni yiliga 600 million dollar miqdorida subsidiyalamoqda.

Gap shundaki, “sizga Daniyadan ko'ra ko'proq to'laymiz”, dedi gazeta manbalaridan biri.

Jurnalistlarning fikricha, ichki rejalashtirish shuni ko'rsatyaptiki, ma'muriyatning Grenlandiyani qo'lga kiritishga bo'lgan intilishlari Tramp fikridan chetga chiqib, AQSh hukumati siyosatida o'z aksini topa boshlagan.

Ma'lumki, Donald Tramp Grenlandiya ustidan nazoratni o'z qo'liga olish niyatini bir necha bor e'lon qilgan edi. Yakshanba kuni u buni yana takrorladi va bu 100 foiz sodir bo'lishini qo'shimcha qildi. Biroq u harbiy kuch ishlatishni istisno etmadi.

Shuningdek, yaqinda AQSh Vitse-prezidenti Jey Di Vens Grenlandiyadagi Amerika harbiy bazasiga tashrif buyurdi. U Daniyaning orolga nisbatan siyosatini tanqid qildi va Trampning uning Amerika uchun strategik ahamiyati haqidagi bayonotlarini yana eslatib o'tdi, deb xabar beradi korrespondent.net.