Prezident Vashingtondagi otishmadan keyin ikki nafar Milliy gvardiya harbiy xizmatchisi halok bo'lgach, bu borada buyruq berdi, deb xabar berdi CNN.
AQSh Fuqarolik va immigratsiya xizmatlari (USCIS) direktori Jozef Edlou Prezident unga ushbu mamlakatlardan kelgan fuqarolarning barcha amaldagi grin-kartalarini “to'liq va batafsil ko'rib chiqish”ni buyurganini aytdi.
Xabarlarga ko'ra, 19 mamlakat orasida Afg'oniston, Myanma, Chad, Kongo Respublikasi, Ekvatorial Gvineya, Eritreya, Gaiti, Eron, Liviya, Somali, Sudan, Yaman, Burundi, Kuba, Laos, Syerra-Leone, Togo, Turkmaniston va Venesuela bor.
USCIS ko'rib chiqish davomida “mazkur mamlakatga xos salbiy omillar”, jumladan, “xavfsiz shaxsni tasdiqlovchi hujjatlarni berish” imkoniyatini hisobga olishini ta'kidladi.
Bu qaror Afg'oniston fuqarosi Rahmanulla Lakanval otishmada gumonlanuvchi sifatida topilganidan keyin qabul qilindi. U 2021-yilda Amerika qo'shinlari Afg'onistondan olib chiqilgandan so'ng afg'onlarga maxsus immigratsiya himoyasini taqdim etuvchi dastur doirasida AQShga kelgan va 2025-yil aprel oyida boshpana olgan.
Ichki xavfsizlik departamenti afg'on fuqarolari bilan bog'liq barcha immigratsiya so'rovlarini darhol to'xtatib qo'yganini va Jo Bayden davrida tasdiqlangan boshpana ishlarini ko'rib chiqayotganini e'lon qildi.
2021-yilda Amerika qo'shinlari Afg'onistondan olib chiqilganidan beri 190 mingdan ortiq afg'onistonliklar AQShga ko'chib o'tishdi, deb xabar berdi 24.kg.
Videomurojaatda Donald Tramp Bayden ma'muriyatini otishmada gumon qilinayotgan shaxsning kirishiga ruxsat berganlikda aybladi. Uning so'zlariga ko'ra, mamlakat “Bayden davrida Afg'onistondan kelgan har bir kishini qayta tekshirishi” va “AQShga foyda keltirmaydigan” har qanday mamlakatdan kelgan chet elliklarni deportatsiya qilish choralarini ko'rishi kerak.
