AQShning Yaman poytaxti Sana shahriga uyushtirgan zarbalari oqibatida “Ansor Alloh” harakatining husiy isyonchilari nazorati ostidagi va mamlakatning boshqa hududlarida kamida 31 nafar tinch aholi vakili halok bo'ldi, 100 dan ortiq kishi yaralandi. Bu haqda isyonchilarning Sog'liqni saqlash vazirligi vakili Anis al-Asbaxiy ma'lum qildi.

“Dastlabki ma'lumotlarga ko'ra, Amerikaning Sanadagi tumanlar, Saada, Al-Bayda viloyatlari va Rada [shahri] dagi tinch aholi [obyektlari] va turar-joy mavzelariga qaratilgan tajovuzi oqibatida 31 kishi halok bo'lgan, 101 kishi yaralangan”, deb yozadi u X ijtimoiy tarmog'ida. Al-Asbaxiyga ko'ra, halok bo'lganlarning aksariyati ayollar va bolalardir.

15-mart kuni AQSh Qurolli kuchlari Prezident Donald Trampning buyrug'i bilan Yamandagi husiylar nazorati ostidagi hududga ommaviy zarbalar berishni boshladi. Operatsiya Amerika manfaatlarini himoya qilish va kemalarning erkin harakatlanishini ta'minlashga qaratilgan, dedi AQSh Qurolli kuchlari Markaziy qo'mondonligi. “Ansor Alloh” harakati tinch aholi ob'ektlari nishonga olinayotganini da'vo qilib, keskinlashuvga javob berishga va'da berdi, deb xabar beradi tass.ru.