Senatning navbatdagi yalpi majlisida mazkur qonun loyihasi muhokama qilindi.

Taʼkidlanganidek, soʻnggi yillarda mamlakatimizda avtomobil yoʻllari infratuzilmasini rivojlantirish boʻyicha keng koʻlamli ishlar amalga oshirilmoqda. Biroq amaldagi qonun bugungi kun talablariga toʻliq javob bermaydi.

Yangi tahrirdagi qonunning asosiy maqsadi avtomobil yoʻllarini rivojlantirish, ulardan foydalanish taribini belgilash hamda sohadagi munosabatlarni zamonaviy talablar asosida tartibga solishdan iborat.

Hujjatda avtomobil yoʻllari sohasida amal qilinishi shart boʻlgan asosiy prinsiplar aniq belgilab qoʻyilmoqda. Jumladan, yoʻllar ilmiy hisob-kitoblar asosida loyihalanishi, qarorlar ochiq va shaffof boʻlishi, yoʻl harakati xavfsizligi taʼminlanishi, atrof-muhitga zarar etkazilmasligi hamda fuqarolar uchun teng va qulay foydalanish imkoniyati yaratilishi nazarda tutilgan.

Qonunda muhim yangilik sifatida avtomobil yoʻllari bepul yoki belgilangan taribda pulli boʻlishi mumkinligi mustahkamlanmoqda. Shuningdek, sohadagi maxsus vakolatli organ sifatida Oʻzbekiston Respublikasi Transport vazirligi huzuridagi Avtomobil yoʻllari qoʻmitasi belgilanmoqda.

Yoʻl harakati xavfsizligiga alohida eʼtibor qaratilgan. Xususan, avtomobil yoʻllarida sunʼiy toʻsiqlar va notekisliklar yaratish taqiqlanmoqda, ogʻir vaznli va yirik gabaritli transport vositalarining harakatlanishi esa faqat maxsus ruxsatnoma asosida amalga oshirilishi nazarda tutilmoqda.

Qonunda pulli yoʻllarni tashkil etish, davlat-xususiy sheriklik asosida moliyalashtirish, toʻlovlarni avtomatlashtirilgan tarzda undirish, shuningdek, foydalanuvchi va operator oʻrtasidagi munosabatlar ham tartibga solinmoqda.

Soʻzga chiqqanlar mazkur qonun normalari yoʻllarni asrash, avariyalar sonini kamaytirish va inson hayotini muhofaza qilishga xizmat qilishini taʼkidladilar.

Senatorlar fikricha, ushbu qonunning qabul qilinishi mamlakatda yoʻl infratuzilmasi rivojlanishiga, harakat tezligi oshishiga, tirbandliklar kamayishiga va yoʻl-transport hodisalari soni qisqarishiga zamin yaratadi.

Yalpi majlis yakunida qonun senatorlar tomonidan maʼqullandi.