Eksponatlarning uch o‘lchamdagi tasvirlari professional kameralar tomonidan suratga muhrlandi.
To‘raqo‘rg‘on tumani Yakkatom mahallasida joylashgan Axsi sayyidlari ilmiy-maʼrifiy, meʼmoriy majmuasi tarkibidagi ushbu muzeyida Mirzo Bobur va Temuriylar davriga oid mingdan ortiq eksponat to‘plangan. Ahamiyatlisi, ularning bari shu qishloqdagi qazishma ishlari davomida qo‘lga kiritilgan noyob topilmalardir.
– Muzeyimizda I asrdan XX asr boshlarigacha bo‘lgan davrda foydalanuvda bo‘lgan ashyolar saqlanmoqda, – deydi majmua rahbari Bilolxon Rustamov. – Ular orasida 2000 yillik suvdon, 1000 yillik shamshir va qilich, 1200 yillik muhr alohida o‘ringa ega.
Ayni paytda muzey uchun yangi joy hozirlanmoqda. Majmua tarkibidagi Hunarmandchilik markazi, ilmiy-qo‘lyozmalar maktabi ham joriy yilda foydalanishga topshiriladi.
