Qarorga muvofiq, Jizzax va Navoiy viloyatlarining turistik salohiyatini rivojlantirish maqsadida Aydar–Arnasoy koʻllar tizimi hamda Toʻdakoʻl koʻlida rekreatsion koʻllar hududi tashkil etiladi.
Shunga koʻra, mazkur rekreatsion koʻllar hududida 2021–2025-yillarda turizmni rivojlantirish konsepsiyasi tasdiqlandi.
Rekreatsion koʻllar hududiga kiruvchi yer uchastkalarini tadbirkorlarga berish, ularda qurilish va barpo etish loyihalarini amalga oshirish Turizm va sport vazirligi bilan majburiy tartibda kelishiladi.
Rekreatsion koʻllar hududiga kirish nuqtasida axborot markazi va zamonaviy avtoturargoh tashkil etiladi.
Shuningdek, tashrif buyuruvchilarning xavfsizligini taʼminlash maqsadida rekreatsion koʻllar hududida qutqatuv brigadasi faoliyati yoʻlga qoʻyiladi.
Qaror bilan tasdiqlangan konsepsiyani amalga oshirish orqali har biri 5 yillik davrni oʻz ichiga olgan 3 bosqichli quyidagi natijalarga erishiladi:
- Birinchi bosqichda, jami 204 oʻrinli 6 ta joylashtirish vositasi, shuningdek, hududda ekoturistik obyektlar, ovchilik va suvda dam olish hududlari tashkil etiladi;
- Ikkinchi bosqichda, Aydarkoʻl atrofidagi 33 ming gektar hududda yangi turistik hududlar, joylashtirish vositasi, sogʻlomlashtirish maskanlari, sport tadbirlari oʻtkaziladigan maydonlar barpo etiladi;
- Uchinchi bosqichda, 300 oʻrinli joylashtirish vositalari va sport tadbirlari oʻtkaziladigan maydonlar tashkil etiladi, 1 200 oʻringa moʻljallangan avtoturargoh hamda savdo hududi quriladi.
Rekreatsion koʻllar hududi va unga olib boruvchi 271 km yoʻllar taʼmirlanib, qurilish ishlari amalga oshiriladi.
