Superogʻir vazn toifasidagi bokschimiz Bahodir Jalolovning navbatdagi jangi boʻyicha tafsilotlar paydo boʻldi.
Unga koʻra, charm qoʻlqop ustamiz 2025-yilning 6-fevral kuni Kanadaning Monreal shahrida tashkil etiladigan professional boks oqshomi doirasida ringga qaytadi. Jalolovga oʻsha kuni fransiyalik Devid Spilmont raqiblik qilishi mumkin. Hozircha bu xabar rasman tasdigʻini topmadi.
Maʼlumot uchun, Bahodir Jalolov professional faoliyati davomida hozirga qadar 14 ta jang oʻtkazib, ularning barchasida gʻalaba qozongan. Soʻnggi jangini 2023-yil 17-noyabr kuni JAR vakili Kris Tompsonga qarshi oʻtkazib, ilk raunddayoq nokaut orqali zafar quchgandi.
Uning ehtimoliy raqibi Devid Spilmont esa shu kungacha 27 ta jang oʻtkazib, 16 gʻalaba, 8 magʻlubiyat va 1 ta durang qayd etgan. Gʻalabalarining 11 tasini nokaut orqali qoʻlga kiritgan.
