IIV matbuot xizmatining xabar qilishicha, bankdan 90 ming dollar oʻgʻirlagan jinoiy guruh qoʻlga olindi.

Shu yilning 18-iyun kuni Yashnobod tumani Ichki ishlar organlari faoliyatini muvofiqlashtirish boshqarmasi boshligʻi nomiga “Tenge bank” chakana xizmatlar koʻrsatish boʻlimi boshligʻi ariza bilan murojaat qilgan. Unda nomaʼlum shaxslar tomonidan 90 ming AQSH dollari miqdorida pul mablagʻlari talon-toroj qilinganini bildirgan.

Olib borilgan surishtiruv ishlari natijasida shu kunning oʻzida bir necha shaxslar bank kassasiga mijoz sifatida tashrif buyurib, bank kartasida mavjud 90 ming dollarni naqdlashtirish maqsadida POS-terminalga yolgʻon axborot kiritish yoʻli bilan shuncha pulni olib ketgani aniqlangan.

Zudlik bilan tezkor-texnik tadbirlar amalga oshirilib, ushbu xatti-harakatlarni sodir etgan jinoiy guruhning barcha aʼzolari qoʻlga olingan.

“Bank xodimi bilan kelishgan holda, bizlar bankka kirib, 90 000 AQSH dollarini programma orqali yechib oldik. Men shu qilgan ishimdan juda ham pushaymonman, sizlar ham unaqa joylarga kirmanglar, yengil pul hech qachon hech qayerda boʻlmaydi”, — deydi qoʻlga olingan shaxslardan biri.

Oʻtkazilgan tezkor tadbir davomida 12 dona telefon apparati, POS-terminal, 9 dona bank kartalari, 1 670 000 soʻm va 36 495 dollar ashyoviy dalil sifatida olingan.

Jami 9 nafar shaxs Jinoiy-protsessual kodeksining 221-moddasi tartibida ushlangan. Ayni paytda holat yuzasidan tezkor-qidiruv tadbirlari davom ettirilmoqda.