Bugun kunduzi respublika hududining katta qismida quruq va juda iliq ob-havo saqlanib turadi, harorat 22-27 daraja, janubda 30 darajagacha boʻladi.

Faqat Qoraqalpogʻiston Respublikasi, Xorazm viloyatida va Navoiy viloyati shimolida baʼzi joylarda biroz yomgʻir yogʻishi mumkin.

Ertaga 9-aprel kuni Toshkent, Samarqand, Jizzax, Sirdaryo viloyatlarida va Fargʻona vodiysi viloyatlarida baʼzi joylarda yomgʻir yogʻadi va havo harorati 15-20 darajagacha pasayadi.

Buxoro, Navoiy viloyatlarida faqat kechasi va ertalab biroz yomgʻir yogʻishi mumkin. Qoraqalpogʻiston Respublikasi, Xorazm, Qashqadaryo, Surxondaryo viloyatlarida yogʻingarchilik kutilmaydi. Havo harorati 15-20 darajagacha pasayadi.

10-11-aprelda Oʻzbekistonning barcha hududlari boʻyicha yogʻingarchilik kutilmaydi. Havo harorati yana 22-27 darajagacha, janubda 30 darajagacha koʻtariladi.

12-14-aprel kunlari beqaror ob-havo boʻlishi kutilmoqda. Baʼzi joylarda yomgʻir yogʻadi, ayrim joylarda momaqaldiroq boʻladi.

Harorat asosan kechalari 7-12 daraja, kunduz kunlari 18-23 daraja boʻladi. Respublika shimolida yomgʻir yogʻishi ehtimoli kam.

Togʻli hududlarda 9 va 12-14-aprel kunlari vaqti-vaqti bilan yogʻingarchilik (yomgʻir, baland togʻlarda qor) boʻladi. Qor koʻchishi xavfi saqlanib turadi.

Respublikaning ayrim joylarida shamol tezligi 15-20 m/s gacha kuchayishi mumkin.

Poytaxtda: bugun kunduzi havo asosan biroz bulutli boʻladi, yogʻingarchilik kutilmaydi. Harorat 24-26 daraja boʻladi.

9-aprelda ertalab va kunning birinchi yarmida vaqti-vaqti bilan yomgʻir yogʻadi. Harorat 16-18 daraja boʻladi.

10-11-aprelda yogʻingarchilik kutilmaydi. Harorat 22-24 daraja boʻladi.

12-aprelda kunning ikkinchi yarmida va 13-14-aprel kunlari vaqti-vaqti bilan yomgʻir yogʻadi. Harorat 18-23 daraja boʻladi. Harorat asosan kechalari 7-12 daraja boʻladi.