Mustaqillik yillarida mamlakatimiz hayotining barcha sohalarida amalga oshirilgan keng ko‘lamli islohotlar, bunyodkorlik ishlari va yangilanishlar xalqimizning tinchlik, osoyishtalik va farovon hayotga bo‘lgan intilishi bilan chambarchas bog‘liq.
Bu qutlug‘ sana bizni bosib o‘tilgan yo‘lni sarhisob qilishga, bugungi yutuqlarimizni qadrlashga va kelajak oldidagi mas’uliyatimizni yanada chuqurroq anglashga undaydi. Zero, mustaqillik – faqat tarixiy sana emas, balki xalqning o‘z taqdirini o‘zi belgilash, milliy taraqqiyot yo‘lini mustaqil tanlash va farzandlari uchun munosib kelajak barpo etish imkoniyatidir.
Shu ma’noda, davlatimiz mustaqilligining 35 yilligi arafasida ilgari surilayotgan “Yagona Vatan, yagona xalq bo‘lib, yangi hayot va kelajak yaratamiz!” degan ezgu g‘oya bugungi taraqqiyotimizning mazmun-mohiyatini o‘zida mujassam etadi.
Vatan – inson uchun eng ulug‘ va muqaddas tushunchalardan biridir. U faqat biz tug‘ilib o‘sgan zamin emas, balki ajdodlarimizning tarixiy xotirasi, bugungi hayotimiz va kelajak avlodlar taqdirini birlashtirib turadigan ma’naviy makondir.
Yagona Vatan g‘oyasi bizni umumiy tarix, umumiy qadriyatlar, umumiy orzu va maqsadlar atrofida birlashtiradi. Vatan ravnaqi, uning tinchligi va farovonligi har bir fuqaroning hayoti bilan bevosita bog‘liq.
Shuning uchun Vatan taraqqiyotiga daxldorlik hissi faqat balandparvoz so‘zlarda emas, balki kundalik hayotimizdagi halol mehnat, qonunlarga hurmat, jamiyat manfaatlariga mas’uliyatli munosabat va bunyodkorlik tashabbuslarida namoyon bo‘lishi kerak.
Bugun yurtimizda amalga oshirilayotgan islohotlarning mazmunida ham inson qadrini ulug‘lash, xalq farovonligini ta’minlash va fuqarolarning munosib hayot kechirishi uchun zarur shart-sharoitlarni yaratish kabi ezgu maqsadlar mujassam.
Xalqning buyukligi, avvalo, uning birlik va hamjihatligida namoyon bo‘ladi. Ajdodlarimizdan meros bo‘lib kelayotgan “Birlik bor joyda – baraka bor” degan hikmat bugungi kunda ham o‘z ahamiyatini yo‘qotmagan.
Yagona xalq bo‘lish – barcha insonlarning bir xil fikrlashi yoki bir xil qarashga ega bo‘lishi degani emas. Aksincha, turli fikr va qarashlarga hurmat bilan munosabatda bo‘lib, umumiy manfaatlar yo‘lida birlasha olish – chinakam fuqarolik birdamligining muhim belgisidir.
Jamiyatda o‘zaro hurmat, bag‘rikenglik, mehr-oqibat va hamkorlik muhiti qanchalik mustahkam bo‘lsa, uning taraqqiyot imkoniyatlari ham shunchalik kengayadi. Chunki katta bunyodkorlik ishlari, ulkan maqsadlar va strategik vazifalar faqat umumiy sa’y-harakat, o‘zaro ishonch va hamjihatlik asosidagina amalga oshadi.
Bugungi O‘zbekistonning taraqqiyot yo‘li ham xalqimizning ana shunday bunyodkorlik salohiyati va birlik ruhiga tayanmoqda.
Mustaqillik yillarida yurtimizda hayotning barcha jabhalarida tub o‘zgarishlar yuz berdi. Ta’lim, ilm-fan, iqtisodiyot, sog‘liqni saqlash, madaniyat, tadbirkorlik, axborot texnologiyalari va boshqa ko‘plab sohalarda yangi imkoniyatlar yaratildi.
Ayniqsa, so‘nggi yillarda amalga oshirilayotgan keng ko‘lamli islohotlar jamiyat va davlat hayotini yangilash, inson huquq va manfaatlarini ta’minlash, fuqarolarning faolligini oshirish hamda zamonaviy taraqqiyot uchun mustahkam zamin yaratishga qaratilgan.
Shu nuqtayi nazardan, “yangi hayot” tushunchasi faqat moddiy farovonlik bilan cheklanmaydi. Yangi hayot – bu yangicha fikrlash, zamonaviy bilim va ko‘nikmalarga ega bo‘lish, qonunlarga hurmat bilan qarash, tashabbuskorlik va mas’uliyatni kuchaytirish, inson qadrini ulug‘lash va jamiyat taraqqiyotiga daxldorlikni chuqur his etishdir.
Demak, yangi hayot, avvalo, insonning o‘zidan boshlanadi.
Bugungi O‘zbekiston aholisining katta qismini yoshlar tashkil etadi. Ularning bilim olishi, zamonaviy kasb-hunarlarni egallashi, ilm-fan va innovatsiyalarga intilishi mamlakatimizning kelajakdagi taraqqiyotini belgilovchi asosiy omillardan biridir.
Shu sababli yosh avlodni Vatanga muhabbat, milliy va umuminsoniy qadriyatlarga hurmat, yuksak huquqiy va axborot madaniyati ruhida tarbiyalash muhim vazifalardan biridir.
Yoshlar o‘z kelajagini Vatan kelajagidan ayro tasavvur qilmasligi kerak. Chunki yangi kelajakni aynan bugungi yoshlar yaratadi. Ularning har bir yutug‘i, ilmiy izlanishi, tadbirkorlik tashabbusi, halol mehnati va jamiyat hayotidagi faol ishtiroki mamlakat taraqqiyotiga qo‘shilgan munosib hissadir.
“Yagona Vatan, yagona xalq bo‘lib, yangi hayot va kelajak yaratamiz!” degan g‘oya yoshlarni ana shu ulug‘ maqsad atrofida birlashtirishga, ularda daxldorlik va fuqarolik mas’uliyatini kuchaytirishga xizmat qiladi.
Birdamlik va hamjihatlik avvalo oiladan boshlanadi. Oiladagi o‘zaro hurmat, mehr-oqibat va mas’uliyat jamiyatdagi ijtimoiy munosabatlarning ham muhim poydevoridir.
Mahalla esa xalqimizning ko‘p asrlik hamjihatlik an’analarini o‘zida mujassam etgan noyob ijtimoiy makondir. Mahallada odamlarning bir-biridan xabar olishi, ehtiyojmandlarni qo‘llab-quvvatlashi, yoshlar tarbiyasiga befarq bo‘lmasligi va umumiy muammolarni birgalikda hal etishi jamiyatdagi birdamlikni yanada mustahkamlaydi.
Shu bois yagona xalq degan tushuncha, avvalo, o‘zaro mehr-oqibat, qo‘llab-quvvatlash va umumiy mas’uliyatni anglashdan boshlanadi.
Bugungi kunda hayotimizni internet, ijtimoiy tarmoqlar va raqamli texnologiyalarsiz tasavvur qilish qiyin. Axborot makoni insonlar o‘rtasidagi muloqot va hamkorlik uchun katta imkoniyatlar yaratmoqda.
Biroq axborotning tez tarqalishi fuqarolardan yanada yuqori mas’uliyatni talab qiladi. Yolg‘on yoki tekshirilmagan axborotlarni tarqatmaslik, turli provokatsiyalarga berilmaslik, boshqalarning sha’ni va qadr-qimmatini hurmat qilish, axborotni tanqidiy tahlil qila olish bugungi fuqarolik madaniyatining muhim jihatlaridir.
Shunday ekan, bugungi birdamlik tushunchasi real hayot bilan bir qatorda virtual makonda ham namoyon bo‘lishi kerak. Sog‘lom axborot muhiti jamiyatdagi o‘zaro ishonchni mustahkamlaydi, ishonch esa hamjihatlikning muhim shartidir.
Har qanday mamlakatning buyuk kelajagi bir kunda yoki bir kishining sa’y-harakati bilan yaratilmaydi. U millionlab insonlarning kundalik halol mehnati, bilim va tajribasi, tashabbusi va fidoyiligi natijasida bunyod bo‘ladi.
Maktabda bilim berayotgan o‘qituvchi, inson salomatligini asrayotgan shifokor, ilmiy izlanish olib borayotgan olim, yangi ish o‘rinlari yaratayotgan tadbirkor, yurt obodligi uchun mehnat qilayotgan ishchi, kelajagi uchun intilayotgan yosh – barchasi yagona maqsadga xizmat qilayotgan bunyodkor kuchdir.
Shu jihatdan qaraganda, “Yagona Vatan, yagona xalq bo‘lib, yangi hayot va kelajak yaratamiz!” degan g‘oya har birimizga bevosita daxldor. Chunki yangi hayot ham, buyuk kelajak ham tayyor holda kelmaydi – uni o‘z qo‘limiz bilan yaratamiz.
Davlatimiz mustaqilligining 35 yilligi biz uchun nafaqat faxr va iftixor, balki kelajak oldidagi mas’uliyatni yanada chuqurroq his etish imkoniyatidir.
O‘tgan davrda erishilgan yutuqlar bizni ruhlantirsa, kelajakdagi ulkan vazifalar yanada katta mas’uliyat bilan harakat qilishga undaydi. Endilikda mamlakatimizning taraqqiyoti, xalqimiz farovonligi va yosh avlodning kelajagi uchun yanada katta marralarni ko‘zlashimiz zarur.
Buning uchun esa bizga eng avvalo tinchlik, barqarorlik, o‘zaro ishonch, birlik va hamjihatlik kerak.
Yagona Vatan – bizni birlashtiradigan muqaddas zamin. Yagona xalq – bizning bebaho kuchimiz. Yangi hayot – umumiy bunyodkorlik maqsadimiz.
Buyuk kelajak – birgalikdagi sa’y-harakatlarimiz natijasidir.
Shunday ekan, Mustaqillikning 35 yilligi munosabati bilan ilgari surilgan “Yagona Vatan, yagona xalq bo‘lib, yangi hayot va kelajak yaratamiz!” degan bosh g‘oya har bir yurtdoshimiz qalbida ezgu maqsad, ishonch va mas’uliyat tuyg‘usini yanada kuchaytirsin.
Zero, birdamlik bor joyda – kuch bor, hamjihatlik bor joyda – taraqqiyot bor. Yagona maqsad yo‘lida birlashgan xalq esa, albatta, buyuk kelajakni bunyod etadi.
Mustaqilligimizning 35 yilligi muborak bo‘lsin!
Yagona Vatanimiz tinch, xalqimiz birdam, kelajagimiz buyuk bo‘lsin!
H.N.Oblomurodova,
TDYU dosenti,
falsafa fanlari boʻyicha
falsafa doktori PhD
