“Oʻzligin tanigan inson yurishi
Arslon yurishidan salobatlidir!”
Zamahshariy bobom aytgan hikmat-la
Sizga xat boshladim, janob Guterresh.
... Sanoqli fursatlar qolgan shu damda
Nyu Yorkka boʻylab dilda orziqish!..
Tarixda ilk bora oʻzbekcha soʻzlar,
Arslon yurak, jasur, mard yurt sultoni!
... Men Oʻzbek ayoli, lek ojiza emas,
Ravshan qalb, aql va shijoatim bor,
Oʻzligin yoʻqotib borayotgan fojianimas,
Eng qiyin damlarda jahon minbariga,
Yurt shaʼni, nomusi va orin koʻtarib chiqayotgan
Janob Mirziyoyevni qoʻllab ovoz beraman!
... Global dunyoning eng kichik tashvishi Oqibat,
Mehr boʻlib qolmayaptimi, axir janob?!..
Dunyo tizginlari qattiq tortilib,
odamlar duv-duv toʻkila boshlaganda vabo chohlariga...
“Pandemiya davrida yagona Yechim–
Oʻzaro birdamlik mitingi!”
deya murojaat-la chiqqan kuningiz
Koʻzlarimga uyqu inmadi sira...
Biz qaysi Dunyoga badargʻa boʻldik?
Qaysi gunohlar va xatolar uchun
Yer shari bunchalar turibdi qalqib?..
Nega bugungi avlod javob beradi
Gunohkor Havvolar, Atolar uchun?!..
Prezidentim dunyo bolalarin bagʻriga bosib,
Kelajak huquqin qaygʻurgan damda
Men ham arosatda qolgan avlod huquqin
talab qilaman bu olamning barcha kattalaridan!
...Ha, soniyalar bormoqda yonib,
Oʻzbekiston vaqti bilan Tinchlik bongida
Yangi Uygʻonish davri ostonasida
Yurtim bayrogʻini baland koʻtarib,
Birlashgan Millatlar Tashkilotining
75 yillik tantanasida
Omonlik, Tinchlik, Adolat, Sogʻlik
Bilim va Ozodlik uchun ovoz beraman!..
... Yana qay ellarda notinchlik vahmi-la
Nafs, boylik, hukumat ishqida
talvasaga tushgan lahzalar yonmoqda...
Dunyoni bu zulmat qopqalaridan,
Qutqarishga undash uchun jahon minbariga chogʻlangan
Yuksak shijoat sohibini – Prezidentimni
Qoʻllab-quvvatlayman, janob Guterresh!!!
Muxtasar TOJIMAMATOVA,
shoir
