Qaror bilan gimnastika sport turlarini rivojlantirishning asosiy yoʻnalishlari belgilandi.
Qarorga koʻra, 2023/2024 oʻquv yilidan:
▫️bogʻchalarda “Gimnastikaga ilk qadam” dasturi;
▫️maktablarda boshlangʻich sinf oʻquvchilariga moʻljallangan “Bolalar uchun gimnastika” dasturi joriy qilinadi.
Nukus, Samarqand va Fargʻona shaharlarida zamonaviy moddiy-texnika va oʻquv-mashq bazasiga ega boʻlgan hududiy Gimnastika sport turlariga tayyorlash markazlari tashkil etiladi.
Mazkur Gimnastika markazlari yuridik shaxs maqomiga ega boʻlgan ixtisoslashtirilgan davlat sport-taʼlim muassasasi hisoblanib, oʻz faoliyatini 2024/2025 oʻquv yilidan boshlaydi.
Gimnastika markazlari oʻquvchilarining umumiy kontingenti jami 132 nafarni tashkil etib, ular 1–11-sinf oʻquvchilaridan iborat boʻladi.
Gimnastika markazlarining oʻquv dasturini oʻzlashtirgan va yakuniy davlat attestatsiyasidan oʻtgan 11-sinf bitiruvchilariga davlat namunasidagi diplom beriladi.
Mazkur diplom berilgan mutaxassislik (trener, trener-seleksioner) boʻyicha mehnat faoliyatini amalga oshirish mumkin boʻladi.
Qarorga koʻra, 2023/2024 oʻquv yilidan Oʻzbekiston davlat jismoniy tarbiya va sport universiteti va uning filiallarida gimnastika boʻyicha amaldagi oʻqishga qabul qilishning davlat buyurtmasi parametrlari 2 baravarga oshiriladi.
2023-yil 1-yanvardan anʼanaviy tarzda gimnastika sport turlari boʻyicha Oʻzbekistonda quyidagi musobaqalar oʻtkaziladi:
gimnastrada sport turi boʻyicha xotin-qizlar oʻrtasida Prezident kubogi;
badiiy gimnastika boʻyicha yoshlar oʻrtasida “Yorqin yulduzcha” va kattalar oʻrtasida “Grand Prix Uzbekistan” xalqaro turniri;
sport gimnastikasi boʻyicha “Duxoba yoʻl” xalqaro turniri;
trampolin boʻyicha “Samodan baland” xalqaro turniri;
xalqaro gimnastika kuniga bagʻishlab oʻtkaziladigan “Gymnastics Day” butun Oʻzbekiston ommaviy forumi;
umumiy oʻrta taʼlim maktablari oʻquvchilari oʻrtasida “Xalq taʼlimi vaziri kubogi”;
gimnastika sport turlari boʻyicha Xalqaro gimnastika federatsiyasining tasdiqlangan norma va qoidalarida belgilangan yosh toifalari boʻyicha uch bosqichli (tuman/shahar, hududiy va respublika) chempionatlar va kuboklar.