Bu haqda respublika tashqi ishlar vaziri Jeyhun Bayramov AzTV davlat telekanaliga bergan intervyusida ma'lum qildi.
“Noyabr oyi oxirida biz Armanistondan tinchlik shartnomasi bo'yicha navbatdagi takliflar to'plamini oldik. Bir oy ichida biz o'zimiz ishlab chiqqan takliflar to'plamini qarama-qarshi tomonga qaytardik. Bu jarayon davom etmoqda”, dedi u.
Bayramovning ta'kidlashicha, tinchlik shartnomasi ustida ishlash jarayonining muhim qismi tomonlarning bevosita uchrashuvlaridir. “O'ylaymanki, bunday uchrashuvlar 2024-yilda bo'lib o'tadi”, deya qo'shimcha qildi u.
Ozarbayjon tashqi ishlar vaziri, shuningdek, Boku tinchlik shartnomasi bilan bog'liq masalalarga “real va optimizm bilan yondashayotganini” ta'kidladi. “Biz tushunamizki, tinchlik kelishuvi barcha masalalarni 100 foiz hal eta olmaydi. Lekin u ikki davlat o'rtasidagi munosabatlarni rivojlantirish uchun poydevor, asos yaratishi mumkin”, dedi Bayramov. Uning fikricha, “tinchlik shartnomasi Ozarbayjon va Armaniston o'rtasidagi normal qo'shnichilik munosabatlariga asos soluvchi hujjatga aylanishi mumkin”. “Ozarbayjon davlati o'z kuchi bilan barcha choralarni ko'radi”, dedi u.
Bayramovning ta'kidlashicha, Boku Armaniston siyosiy rahbariyatining bayonotlarini diqqat bilan kuzatib bormoqda. “Biz ma'lum ijobiy xabarlarni eshityapmiz. Lekin ijobiy xabarlar va so'zlar qanchalik muhim bo'lmasin, eng muhimi, ularning haqiqiy harakatlarga aylanishidir”, dedi Ozarbayjon tashqi ishlar vaziri.
21-noyabr kuni Armaniston tashqi ishlar vazirligi Yerevan tinchlik shartnomasi bo'yicha oltinchi taklifni Bokuga kiritgani haqida ma'lum qilgandi, deb xabar beradi tass.ru.
