— Bizga baʼzida 12-15 yoshli oʻsmirlar murojaat qiladi. Ota-onalari farzandining rangi oqarib, holsizlanib, qon bosimi oshib ketganini, tibbiy muasassalarda kamqonlikdan davolanishganini aytishadi. Lekin davo choralaridan naf boʻlmasdan, bolaning ahvoli ogʻirlashib boradi va oxir-oqibat nefrolog shifokorga murojaat qilishadi.Tekshirganimizda, ularda surunkali buyrak kasalligining soʻnggi bosqichi aniqlanadi.
Bu bosqichda shifokorga murojaat qilgan, ikkala buyraklari ham ishdan chiqib, nefrosklerozga uchragan bolalar hayotining eng faol va goʻzal davrida doimiy ravishda haftasiga uch marta toʻrt soatdan gemodializ muojalalarini olishga majbur.
Gap shundaki, glomerulonefrit va nefrotik sindrom kabi kasalliklar, shuningdek, boshqa bir qator nasliy nefrologik kasalliklarning belgilarsiz (simptomlarsiz) kechadigan turlari ham mavjud boʻlib, ushbu kasalliklarni yagona belgisi peshob tahlilidagi maʼlum bir oʻzgarishlardir.
Baʼzi ota-onalar farzandida sogʻligʻiga birorta shikoyat boʻlmasa, shifokor qabuliga borishni lozim topishmaydi. Nefrologik kasalliklarni belgilarsiz shakllarini aniqlash uchun har yili bolalarni muntazam tibbiy koʻriklardan oʻtkazib turish lozim.
Mazkur koʻriklar nefrologik xastaliklarning belgisiz shakllariga tashhis qoʻyishga imkon yaratadi.
Bizga buyrak kasalliklarining soʻnggi bosqichida, yaʼni buyraklarini asrab qolib boʻlmaydigan ahvolda shifoxonaga murojaat qilgan bemorlar bir necha yil oldin oddiy peshob tahlilini topshirishganda aksariyat holatlarda ularda buyrak yetishmovchiligi rivojlanishini oldini olishga imkon boʻlardi. Bolada hech qanday shikoyat boʻlmagani uchun ota-onalar ham farzandida birorta kasallik mavjud boʻlishiga shubha qilmagan.
Shuning uchun ham bolalarni kamida bir yilda bir marta organizm barcha aʼzo va tizimlarini tibbiy tekshiruvdan oʻtkazib olish muhimligini doim taʼkidlab kelamiz.
