Furqat tumanidagi “Qolgandaryo” massividagi “Sherali Hamza” fermer xoʻjaligi hududidagi dala chetidagi yer maydoni oʻzlashtirilib, 3 gektar yangi tokzor barpo etildi.
Dastlabki hisob-kitoblarga koʻra, nihollar hosilga kirgach, mavsumda 80 mln. soʻmdan ortiq qoʻshimcha daromad olish imkoniyati bor. Bu yerda 2 ming tupdan ortiq sara uzum navlari ekildi. Koʻchatlar baravj rivojlanishi uchun sugʻorish ariqlari ochilib, soʻritoqlar tiklandi.
– Yillar davomida eʼtibordan chetda boʻlgan qarovsiz yerlarni oʻzlashtirish borasida boshlangan tashabbus yangi imkoniyat eshiklarini ochdi, – deydi fermer Sanjar Gʻaniyev. –Xoʻjaligimizda yangi anorzor, uzumzor bogʻlar yaratilmoqda. Bu juda katta imkoniyat. Chunki bugungi mehnat ertangi daromad manbai. Hosil pishib yetilsa, avvalo xoʻjaligimiz dasturxoniga, qolgan qismini bozorga olib chiqib sotish mumkin boʻladi.
Maʼlumot oʻrnida aytganda, Fargʻona viloyatida dala chetidagi 2643 gektar yerlardan samarali foydalashish borasida amaliy ishlar olib borilmoqda.
Rasuljon Kamolov,
“Yangi Oʻzbekiston” muxbiri.
