Buxoroda 40 nafar bog‘cha bolalarini olib ketayotgan avtobus haydovchisi mast ekani ma’lum bo‘ldi

Ma’lum qilinishiсha, joriy yilning 28 aprel kuni yo‘l-patrul xizmati xodimlari tomonidan “Isuzu” rusumli yo‘lovchi tashuvchi transport vositasi to‘xtatib tekshirilgan. Tekshiruv jarayonida haydovchi mast holda ekani va u maktabgacha ta’lim tashkilotining 40 nafar tarbiyalanuvchisini tashib ketayotganи aniqlangan.

Shuningdek, haydovchi YPX xodimlarining qonuniy talablariga ham bo‘ysunmagan.

Sud qaroriga ko‘ra, u O‘zbekiston Respublikasi Ma’muriy javobgarlik to‘g‘risidagi kodeksining 131-moddasi birinchi qismi, 194-moddasi birinchi qismi hamda 128⁸-moddasi birinchi qismida nazarda tutilgan huquqbuzarliklarni sodir etgan deb topildi.

Haydovchiga 3 yil muddatga barcha turdagi avtotransport vositalarini boshqarish huquqidan mahrum qilish hamda bazaviy hisoblash miqdorining 40 baravari — 16 million 480 ming so‘m jarima jazosi tayinlandi.

Haydovchi sudda qilmishidan pushaymon ekanini bildirib, kelgusida bunday holatga yo‘l qo‘ymaslikka va’da bergаn.

Mutasaddilar mazkur holat orqali ota-onalarni farzandlari xavfsizligiga befarq bo‘lmaslikka chaqirdi. Qayd etilishicha, mast holda transport boshqarish inson hayoti va xavfsizligiga jiddiy tahdid soladi.