Bu qardosh xalqlarning asrlab kutgan orzulari, bugungi yorugʻ kunlari va buyuk kelajagining nizomi, desam adashmayman. Uning har bir satrida mintaqamiz taqdiriga boʻlgan chuqur kuyinchaklik va qatʼiy iroda manaman deb turibdi.
Ilm-fan sohasi vakili sifatida toʻliq ishonch bilan ayta olaman: ushbu gʻoyalar Markaziy Osiyodagi Uygʻonish davrining tamal toshi vazifasini oʻtagay. Oʻylab koʻring, yillar davomida oʻrtamizda toʻplanib qolgan sovuq ishonchsizlik muzlari erib ketdi! Bu haqiqiy moʻjiza emasmi?! Prezidentimiz toʻgʻri taʼkidlaganidek, bugungi iliq qoʻshnichilik oʻz-oʻzidan paydo boʻlib qolgan jarayon emas. Bu uzoqni koʻzlab, tinimsiz qilingan mehnat va oqilona diplomatiya mevasidir. Ayniqsa, bir paytlar nizo oʻchogʻi boʻlgan chegaralarning bugun doʻstlik koʻprigiga aylangani xalqlarimiz hayotidagi eng katta tarixiy burilish boʻldi.
Suv va energetika masalalarida ham eski qarashlar sindirildi. Endi har kim oʻz koʻrpasini oʻziga tortmayapti. Qambarota GESi kabi ulkan loyihalar birgalikda qurilayotgani bunga yaqqol misol! Bu faqat iqtisodiy foyda degani emas, bu “bizning taqdirimiz bir, suvimiz ham, nonimiz ham bir” degan ulugʻvor haqiqatning tan olinishidir.
Davlatimiz rahbari “Markaziy Osiyo plyus” formatlariga urgʻu berib, juda toʻgʻri taʼkidladi: biz endi dunyo siyosatining chetdagi tomoshabini emasmiz! Bugun Markaziy Osiyo oʻz soʻzi, oʻz oʻrni va qatʼiy pozitsiyasiga ega boʻlgan qudratli kuchga aylanmoqda. Dunyo notinch boʻlib turgan bir paytda bizning birlashib, yagona mushtum boʻlishimiz tinchligimizning eng ishonchli kafolatidir.
Yana bir ogʻriqli va muhim nuqta bu — yoshlar. Mintaqamiz aholisi oʻsib bormoqda va uning katta qismi aziz yoshlarimiz. Bu biz uchun ham bitmas-tuganmas imkoniyat, ham katta masʼuliyatdir. Maqoladagi “mintaqaviy oʻzlikni anglash” gʻoyasi tomirlarimizdagi qonni joʻshtirib, bizni yanada birlashtirishi aniq. Biz, ilm-fan, ijod vakillari, bu strategik yoʻlni nafaqat qoʻllab-quvvatlaymiz, balki yoshlarimizni shu umumiy qadriyatlar, shu birlik ruhi bilan tarbiyalash uchun bor kuchimizni berishga tayyormiz.
Bir soʻz bilan aytganda, Prezidentimizning ushbu maqolasi siyosiy tafakkurimizda oʻziga xos yangi sahifa ochdi. Undagi bunyodkorlik ruhi va kelajakka yuksak ishonch har bir vatandoshimizning yuragiga yetib borishi shubhasiz.
Chunki yangi Markaziy Osiyo — bizning umumiy uyimiz. Uning tinchligi va farovonligi esa barchamizning eng oliy maqsadimizdir!
Shuhrat SIROJIDDINOV,
akademik
