Ushbu jarayonda ishchi guruh hamda tijorat banklari hamkorligida 156 nafar ayollar tomonidan taklif etilgan loyihalar toʻliq oʻrganib chiqilgan. “Biznes koʻnikma” loyihasi asosida 48 soatlik oʻquv-seminar mashgʻulotlari tashkil qilindi va tadbirkorlik istagida boʻlgan ayollarga sertifikatlar berildi.
Bugungi kunda sertifikat olgan 135 nafar xotin-qizlarga 4 milliard 156 million soʻmlik kredit mablagʻlari ajratildi.
Jumladan, tikuvchilik qilish istagida boʻlgan 105 nafar xotin-qizlarga 3 milliard 171 million soʻm, non mahsulotlari ishlab chiqarishni rejalashtirgan 3 nafar xotin-qizlarga 102 million soʻm, qandolatchilikni yoʻlga qoʻymoqchi boʻlayotgan 5 nafar xotin-qizlarga 170 million soʻm kreditlar ajratildi.
Bundan tashqari, parranda boqishni reja qilgan 1 nafar ayolga 36 million soʻm, pishiriq sexi tashkil qilish maqsadidagi 1 nafar ayolga 33 million soʻm, goʻzallik saloni ochishi uchun yana 1 nafar ayolga 33 million soʻmlik kreditlar berildi.
Maishiy xizmat koʻrsatish sohasi ham tumanimizda kundan-kunga rivojlanib bormoqda. Ayni shu yoʻnalishda ham 3 nafar xotin-qizlarga 121 million soʻm, oʻquv markazi ochishni rejalashtirgan 2 nafar xotin-qizlarga 72 million soʻm, fizioterapiya hamshiraligi xizmatini joriy qilayotgan 1 nafar ayolga 36 million soʻm va boshqa yoʻnalishda tadbirkorlik qilish istagida boʻlgan 13 nafar ayolga 382 million soʻmlik kreditlar ajratildi, deb xabar beradi Chilonzor tuman hokimligi matbuot xizmati.
