Xususan, xavfsizlik va siyosiy hamkorlikni yangi bosqichga koʻtarish maqsadida Samarqandda TDT tashqi ishlar vazirlari va maxsus xizmatlar rahbarlarining birinchi qoʻshma uchrashuvini oʻtkazishni taklif qildi. Shuningdek, Strategik sheriklik, abadiy doʻstlik va qardoshlik toʻgʻrisidagi shartnomani qabul qilish hamda Turkiy davlatlar tashkilotini 2030-yilgacha rivojlantirish strategiyasini ishlab chiqish taklifini bildirdi.

Turkiy xalqlar faqat til, mada­niy-maʼnaviy jihatdan emas, bal­ki savdo-iqtisodiy nuqtayi nazar­dan ham doimiy hamkorlardir. Bu borada qancha qulaylik, yengillik yaratilsa, barcha uchun shuncha yaxshi. Rivojlanish yanada jadallashadi, xalqlar farovonlashadi.

Davlatimiz rahbarining Tosh­kentda Iqtisodiy sheriklik boʻyicha doimiy kengash va loyiha ofisini tashkil etish, Oʻrta yoʻlak­ni “Xitoy — Qirgʻiziston — Oʻzbe­kiston” temir yoʻli va Transafgʻon yoʻlagi bilan bogʻlash, bojxona tartibotini raqamlashtirish, tariflarni optimallashtirish taklifi ham alohida ahamiyatga ega. Sanoat alyansi, “Turkiy yashil yoʻlaklar” va “Yashil transfor­matsiya” konsorsiumlarini yara­tish, shuningdek, organik qishloq xoʻjaligi boʻyicha ekspertlar gu­ruhi tashkil etish hamda turkiy organik mahsulotlar brendini jahon bozoriga olib chiqish esa bu boradagi ishlarni yangi bosqichga olib chiqadi.

Innovatsiya va taʼlim sohasini yanada rivojlantirish maqsadida sunʼiy intellekt hamda kreativ iqtisodiyot boʻyicha “yoʻl xarita­si” qabul qilinishi zamonga mos rivojlanishga qaratilgan saʼy-harakatdir. Chunki bugungi ta­raqqiyot davrida ilgʻor texnolo­giya, sunʼiy intellekt har sohaga jadal kirib kelmoqda. Shunday ekan, zamonaviy texnologiyalar bilan hamqadam boʻlish har qa­chongidan zarur. Oʻzbekistonda Turkiy davlatlar xalqaro uni­versiteti tashkil etilishi hamda Turkiy dunyo xalqaro koʻrgazmasi oʻtkazilishi mutaxassislar tay­yorlash, qoʻshma tadqiqotlar oʻtka­zish uchun ayni muddao boʻladi. Xalqaro oliygoh innovatsiyalar maydoni sifatida taraqqiyotga xizmat qiladi.

Ekstremizm va radikal mafkuraga qarshi kurashish, yoshlarning ekologik savodxonligini oshirish, 2026-yilda “Nizomiy Ganjaviy va Alisher Navoiy ijodi — turkiy dunyo maʼnaviy hayotida” xalqaro konferensiyasi hamda “Turkiy ilm-fan va innovatsiyalar kunlari” oʻtkazilishini barcha ishtirokchilar qoʻllab-quvvatladi.

Sammit davomida hamkorlik samaradorligini oshirish va qa­tor ustuvor yoʻnalishlar boʻyicha koʻp tomonlama sheriklikni mustahkamlashga qaratilgan huj­jatlar qabul qilingani savdo, raqamli texnologiyalar, transport-kommunikatsiya, taʼlim, ilm-fan, madaniy-gumanitar almashinuv borasidagi aloqalarni yanada ken­gaytirib, kelajakda ijobiy nati­jalar beradi.

Alisher SAMADOV,

Toshkent davlat texnika

universiteti Olmaliq

filiali direktori