Qirgʻiziston Bojxona xizmati raisining maʼlum qilishicha, endi chegarani kesib oʻtish uchun haydovchilar oʻziga qulay vaqtni tanlab, mobil telefon orqali elektron navbatga tura oladi.
Bunday tizim dastlab Qizil-Qiyadagi nazorat-oʻtkazish punktida sinov tariqasida joriy etilgan boʻlib, loyiha yaxshi natijalarni koʻrsatgan, nazorat-oʻtkazish punktining oʻtkazish qobiliyati bir necha barobar oshgan.
Qirgʻiziston Bojxona xizmati raisining qoʻshimcha qilishicha, keyinchalik mazkur loyiha barcha nazorat-oʻtkazish punktlarida kengaytiriladi. Hozirda qirgʻiz-qozoq chegarasida elektron navbatni joriy etish masalasi ishlab chiqilmoqda.
Maʼlumot uchun, “Doʻstlik” nazorat-oʻtkazish punkti eng gavjumlaridan biri hisoblanib, u Oʻsh viloyatida, Qirgʻiziston va Oʻzbekiston chegarasida joylashgan.
