Uchrashuv doirasida Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi “Elektron hukumat” loyihalarini boshqarish markazi va Qozogʻiston Respublikasining “Xolding Zerde” kompaniyasi oʻrtasida elektron hukumat tizimini rivojlantirish va aholining raqamli transformatsiyasi boʻyicha hamkorlikni kengaytirish, shu bilan birga tajriba almashish maqsadida memorandum imzolandi, deb xabar beradi Axborot texnologiyalari va kommunikatsiyalarini rivojlantirish vazirligi matbuot xizmati.
2008-yilda tashkil etilgan “Xolding Zerde” AJ mamlakatni raqamlashtirishning asosiy harakatlantiruvchisi hisoblanadi. “Xolding Zerde” elektron hukumatni rivojlantirish bilan shugʻullanadi va davlat organlari uchun IT arxitekturasini yaratadi. Bugungi kunda kompaniya “Raqamli Qozogʻiston” davlat dasturini amalga oshirish boʻyicha tizimli ishlarni olib boradi. Shuningdek, IT -texnologiyalar bozorini rivojlantirish va ilgʻor loyihalarni amalga oshirish bilan shugʻullanadi.
