Bu haqda Kazinform agentligi Anadolu agentligiga tayanib xabar berdi.

Ma’lum qilinishicha, Islom inqilobi qo‘riqchilari korpusi (KSIR) AQSH armiyasiga tegishli HIMARS artilleriya tizimlari joylashgan Bubiyan oroli (Quvayt) hududiga raketalar yo‘llagan. Shuningdek, Bahrayn shimolida joylashgan Patriot havo hujumidan mudofaa tizimlari ham nishonga olingan.

KSIR bayonotida qayd etilishicha, zarbalar BAA hududidagi amerikalik harbiylar joylashgan nuqtalarga ham yo‘naltirilgan. Xususan, yuqori lavozimli qo‘mondonlar va instruktorlar to‘plangan joylar nishonga olingani aytilmoqda.

Bayonotda, shuningdek, BAAdagi Oracle kompaniyasi markazi, Isroilga aloqador kema hamda Bahrayndagi Xalifa bin Salman portiga ham zarbalar berilgani ta’kidlangan.

KSIR ushbu hujumlar “Va’dai sodiq-4” operatsiyasining 95-to‘lqini doirasida amalga oshirilganini bildirgan.

Anadolu agentligi xabar berishicha, Isroildagi Bney-Brak, Petax-Tikva, Tel-Aviv, Ramat-Gan va Kir’yat-Shimona shaharlaridagi obyektlar ham ko‘p marta raketa zarbalariga uchragani iddaо qilinmoqda.

Hozircha ushbu ma’lumotlar mustaqil manbalar tomonidan to‘liq tasdiqlangani haqida xabar berilmadi.