Bu haqda Axios xabar berdi o‘z manbalariga tayanib.
Ma’lum qilinishicha, tashrif seshanba kuni amalga oshirilishi rejalashtirilgan bo‘lib, muzokaralar ehtimoliy kelishuv orqali urushni to‘xtatish masalasiga qaratilgan.
Ayni paytda vaziyat murosaga kelinmagan taqdirda keskinlashishi mumkin. AQSH prezidenti Donald Tramp kelishuvga erishilmasa, Erondagi ko‘priklar va elektr infratuzilmasiga yangi hujumlar amalga oshirilishi mumkinligini ma’lum qilgan.
Tomonlar o‘rtasidagi o‘t ochishni to‘xtatish kelishuvi muddati yakunlanishi arafasida. Dastlab belgilangan ikki haftalik muddat seshanba kuni tugashi kerak edi, ammo Tramp uni chorshanba kechgacha uzaytirish mumkinligini bildirgan.
Eron tomoni muzokaralarda ishtirok etish masalasini kechiktirib kelgani aytilmoqda. Bu esa ichki bosimlar, jumladan, Islom inqilobi qo‘riqchilari ta’siri bilan bog‘liq ekani ta’kidlanmoqda.
Muzokaralarda Pokiston, Misr va Turkiya vositachilik qilmoqda. Manbalarga ko‘ra, Eron delegatsiyasi oliy rahbar roziligidan so‘ng muzokaralarda ishtirok etishga rozilik bildirgan.
Shuningdek, AQSHning maxsus vakillari — Stev Vitkoff va Jared Kushner ham Islomobodga borishi kutilmoqda.
Tahlilchilar fikricha, qisqa muddatda to‘liq kelishuvga erishish qiyin bo‘lishi mumkin, ammo muzokaralarda ilgarilash kuzatilsa, o‘t ochishni to‘xtatish muddati yana uzaytirilishi ehtimoli bor.
