Ushbu yuqori darajadagi uchrashuv Yevropa Ittifoqining 2019-yilgi Markaziy Osiyo boʻyicha strategiyasi doirasida yaqin yillarda Markaziy Osiyoda oʻtkaziladigan bir qator tadbirlarning birinchisi boʻlishi rejalashtirilgan. Yevropa Ittifoqi va Markaziy Osiyo oʻrtasidagi iqtisodiy aloqalarni mustahkamlash strategiyaning ustuvor yoʻnalishlaridan biridir.
Forum ishtirokchilarga barcha tomonlar manfaati uchun barqaror iqtisodiy rivojlanish sohasida Markaziy Osiyoning ustuvor ehtiyojlarini muhokama qilish imkoniyatini beradi. Tadbirning uchta asosiy mavzusi
- yashil tiklanish,
- raqamlashtirish va
- biznes muhitini yaxshilash boʻladi.
Shu sababli, birinchi yuzma-yuz Yevropa Ittifoqi-Markaziy Osiyo iqtisodiy forumi 2021-2027-yillarga moʻljallangan yangi dasturga muvofiq Yevropa Yashil kelishuvi, YEIning raqamlashtirish rejasi, Yevropa Ittifoqining mintaqaviy va ikki tomonlama dasturlari kabi Yevropa Ittifoqi tashabbuslarini hisobga olgan holda ushbu uch sohadagi muammolar va imkoniyatlarga eʼtibor qaratadi. Yevropa Ittifoqi xususiy sektori tomonidan taklif qilingan tashabbuslar va texnologik yechimlar ham muhokama qilinadi.
Bundan tashqari, tadbir Markaziy Osiyo davlatlari vakillari bilan Forumning uchta ustuvor yoʻnalishiga alohida eʼtibor qaratgan holda Yevropa Ittifoqi bilan joriy hamkorlikni, shuningdek, iqtisodiy hamkorlikning yangi imkoniyatlarini har tomonlama muhokama qilish imkonini beradi.
Markaziy Osiyo davlatlari tomonidan milliy hukumatlarning yuqori darajali vakillari, Yevropa Ittifoqi tomonidan esa Yevropa komissiyasining iqtisodiy va savdo masalalari boʻyicha ijrochi vitse-prezidenti Valdis Dombrovskis ishtirok etadi.
“Yuqori darajali ushbu muhim tadbirda Yevropa Ittifoqi vakili boʻlish men uchun katta sharafdir. Markaziy Osiyoning beshta davlati bilan munosabatlarimiz izchil takomillashib boryapti va ushbu iqtisodiy forum tufayli biz mintaqalar oʻrtasidagi oʻzaro hamkorlikda navbatdagi qadamni tashlayapmiz. Biz hamkorlik, savdo va sarmoyani kengaytirish masalalarini muhokama qilamiz, asosiy eʼtiborni barqaror biznes muhitini qoʻllab-quvvatlash hamda iqtisodiyotlarimizni yashil va raqamli oʻzgartirish kabi ustuvor yoʻnalishlarga qaratamiz. Hududlarimizni har qachongidan ham yaqinlashtirishi mumkin”, — dedi Valdis Dombrovskis.
Shuningdek, tadbirda Yevropa Ittifoqiga aʼzo davlatlarning yuqori darajali vakillari, mintaqada YEI loyihalarini amalga oshiruvchi tashkilotlar, Markaziy Osiyo va Yevropadan xususiy sektor vakillari, shuningdek, rivojlanish boʻyicha hamkorlar, jumladan, Yevropa moliya institutlari ishtirok etadi.
Forum Ingliz va rus tillarida boʻlib oʻtadi.
