Meteorologiya idorasining ma’lumotlariga ko‘ra, Londonning “Xitrou” aeroportida harorat 26 mayda 33,5 daraja Selsiyga yetgan.
May oyida qayd etilgan eng yuqori harorat — 32,8 daraja Selsiy bo‘lib, 1922-yilda Londonning Kemden tumanida qayd etilgan. Shu kabi harorat 1944-yilda Ridjents-parkda, shuningdek Xorshem va Tanbridj-Uells shaharlarida ham kuzatilgan.
Sinoptiklar Buyuk Britaniyada issiqlik kuchayishda davom etishi haqida ogohlantirmoqda. Seshanba kuni harorat 35 daraja Selsiyga yetishi mumkin, bu may oyidagi eng yuqori ko‘rsatkichdir.
Bundan tashqari, kecha kechqurun Londonda may oyida tungi harorat 19,4 daraja Selsiyni tashkil etdi. Mutaxassislarning ta’kidlashicha, bunday harorat sog‘liq uchun juda xavflidir, chunki tananing kunduzgi issiqdan tiklanishga vaqti yo‘q.
G‘ayrioddiy issiq ob-havo boshqa Yevropa mamlakatlariga ham ta’sir ko‘rsatdi. Fransiyaning 20 dan ortiq shaharlari barcha davrlardagi harorat rekordlarini yangiladi. Meteo France milliy ob-havo xizmati hozirgi issiqlik to‘lqinini "vaqtdan oldin va uzoq davom etgan" deb atadi.
Ispaniyada bir nechta hududlarda harorat 40 darajaga yetdi. Yevropaning ko‘p qismida hozirda harorat me’yordan 12-15 daraja yuqori, deb xabar berdi Kazinform.
Meteorologlar kelgusi kunlarda Buyuk Britaniya, Fransiya va Ispaniyada yana yuzlab harorat rekordlari yangilanishi mumkinligini taxmin qilishmoqda. Mutaxassislarning fikriga ko‘ra, Yevropadagi issiqlik to‘lqini kamida hafta oxirigacha davom etadi.
