Quvvati 10 MVt boʻlgan Quyosh qurilmasi Gujarat shtatidagi Vadodara shahri chekkasidagi uzunligi 3,6 kilometr boʻlgan sugʻorish kanalida qurilgan. U poʻlat tirgaklarga oʻrnatilgan 33 800 ta quyosh batareyalaridan tashkil topgan.
Mutaxassislar quyosh qurilmalarini kanallarda joylashtirishning ikki asosiy afzalligini alohida qayd etmoqdalar: yerdan unumli va arzon foydalanish hamda qurilma tagidagi kanal oʻzanida suv bugʻlanishini kamaytirish, deb xabar beradi “Sof Energiya” ilmiy-ommabop jurnali.
“Hindiston – qayta tiklanuvchi energetika sohasida jahondagi yetakchi mamlakatlardan biridir, — deb yozadi xabarda. — Prognozlarga koʻra Hindistonda elektr energiyasiga boʻlgan ehtiyoj ushbu bozorning 2050-yillarga kelib olti marotaba oʻsishiga olib keladi. Mamlakat hukumati qayta tiklanuvchi energiya manbalarini (QTEM) rivojlantirishning yirik dasturini roʻyobga chiqaryapti. 2014-yildan 2019-yillar oraligʻida tarmoqqa ulangan QTEM quvvatlari 2,5 karra, yaʼni 32 GVtdan 79 GVtgacha oʻsdi”.