R.Sobitov kasalliklari sababli bu yil tomorqasida ham yaxshi ishlay olmay biroz kamxarj boʻlib qoldi. Aksiga olib, yaqinda yana kasalligi xuruj qila boshladi. U yordam berishini soʻrab, tuman hokimi Ulugʻbek Yalgashevga telefon orqali murojaat qildi.

Tuman rahbarining koʻrsatmasiga binoan shu kunning oʻzida 69-qishloq oilaviy poliklinikasi shifokorlari tomonidan fuqaro Rustam Sobitov tibbiy koʻrikdan oʻtkazilib, unga zarur muolajalar koʻrsatishdi. Shundan keyin 5 kunga yetadigan dori- darmonlari berib, uyiga olib borib qoʻyildi. Mahalla va oilani qoʻllab-quvvatlash tuman boʻlimi xodimlari tomonidan esa R.Sobitovning yashash manziliga oziq-ovqat mahsulotlari yetkazib berildi.

Toshkent viloyati hokimligi axborot xizmati maʼlumotlariga koʻra, Yangiyoʻl tumanida karantin paytida vaqtinchalik ishsiz boʻlgan oilalarni moddiy jihatdan qoʻllab-quvvatlash, ularga yordam koʻrsatish tadbirlari davom etmoqda.

Xususan, joriy yilning 14-26-iyul kunlari tuman Homiylik xayriyalarini muvofiqlashtirish markaziga yordam soʻrab 172 ta murojaat boʻlgan. Ularning 132 tasiga oziq-ovqat mahsulotlari berilgan. Shuningdek, turmush sharoiti ogʻir, boquvchisini yoʻqotgan va nogironligi bor 289 ta oilaga yordam koʻrsatilgan. Hammasi boʻlib, 421 ta xonadonga oziq-ovqat mahsulotlari yetkazib berildi.