Karantin davom etayotgan shu kunlarda moddiy ta'minotida uzilish bo'lib qolayotgan oilalarning ko'pchiligi uchun qiziq bo'lgan savolga Mahalla va oilani qo'llab-quvvatlash vazirligi matbuot kotibi Saodat Boymirzaeva javob berdi.

̶ Mazkur pul mablag'i «Saxovat va ko'mak» jamg'armasi ajratgan xayriya mablag'lari hisobidan berilgan. Jamg'arma hukumatning tegishli qarori asosida yurtimizdagi pandemiya munosabati bilan aholining ehtiyojmand qatlam vakillarini ijtimoiy himoya qilish maqsadida tashkil etilgan.

Jamg'arma mablag'lari tegishli tartibda «Mahalla» fondi Vasiylik kengashi, Qoraqalpog'iston Respublikasi Jo'qorg'i Kengesi, xalq deputatlari viloyatlar, Toshkent shahar, tuman va shahar kengashlarining tasdiqlangan qaror va ro'yxatlari asosida ijtimoiy himoyaga muhtoj, ko'p farzandli oilalar, nogironligi bo'lgan, yolg'iz yashovchi, shuningdek, vaqtincha ishsiz fuqarolarni pul mablag'lari, kundalik iste'mol tovarlari, dori vositalari, shuningdek, boshqa turdagi zarur mahsulotlar bilan ta'minlash uchun sarflanadi

Bu toifaga mansub oilalar ro'yxatini sektor a'zolari hamda mahalla fuqarolar yig'ini vakillari ishtirokida tuzilgan ishchi guruhlari uyma - uy yurgan holda tuzadi. Ijtimoiy yordam shakli oziq-ovqat mahsulotlari, shuningdek, «Saxovat va ko'mak» jamg'armasi hisob raqamlariga kelib tushgan mablag'lardan fuqaroning nomiga ochilgan bank kartasiga ma'lum mablag' o'tkazib berish orqali amalga oshiriladi.

Siz mazkur turdagi ijtimoiy yordamlarni yana qayta olish uchun o'zingiz yashab turgan fuqarolar yig'iniga murojaat qilishingiz tavsiya etiladi. Sizning murojaatingizga ko'ra, ishchi guruh vakillari oilangiz ijtimoiy holatini mavjud vaziyatdan kelib chiqqan holda o'rganib, o'rnatilgan tartibda xulosa beradi.