«InnoTrans 2022» ko‘rgazmasining uchinchi kunida O‘zbekiston delegatsiyasi temir yo‘l sohasidagi dunyodagi yetakchi hisoblanayotgan ishlab chiqarish kompaniyalari bilan bir qator samarali uchrashuvlar va muzokaralar o‘tkazdi. Xususan, «Škoda» (Chexiya) kompaniyasi vakillari bilan uchrashuvda zamonaviy elektrovozlarni sotib olish bo‘yicha takliflari o‘rganildi.

Shveytsariyalik «Stadler» kompaniyasining nafaqat elektrovozlar va yo‘lovchi vagonlari, balki yuk va yo‘lovchi lokomotivlarining zamonaviy texnikalarining taqdimoti bilan yaqindan tanishildi, takliflari o‘rganildi. Bundan tashqari, bu kabi temir yo‘l texnikalarni bizning mamlakatimizda ham hamkorlikda ishlab chiqarishni tashkil etish masalalari muhokama etildi.

Shuningdek, ko‘rgazmaning yana bir ishtirokchilaridan biri, ko‘p yillik hamkorlarimiz – Ispaniyaning «Patentes Talgo S. L. U.» kompaniyasi bilan ham muzokaralar bo‘lib o‘tdi. Uchrashuvda yurtimizga qo‘shimcha yuqori tezlikda harakatlanuvchi poezdlarni sotib olish masalalari muhokama qilindi va yaqinda e'lon qilinishi kutilayotgan tenderda ushbu kompaniya ishtirok etishi taklif etildi. Tomonlar, shuningdek, O‘zbekistonda mavjud bo‘lgan yuqori tezlikda harakatlanuvchi poezdlarni texnik xizmat ko‘rsatish bo‘yicha uzoq muddatli munosabatlarini davom ettirishga kelishib oldilar.

Xalqaro ko‘rgazma doirasida boshqa ekspozitsiyalar va taqdimotlar bilan yaqindan tanishib, yevropa temir yo‘llarida harakatlanadigan va ishlab chiqarilayotgan yo‘lovchi vagonlarining talab va takliflar o‘rganildi, deb xabar beradi Transport vazirligi matbuot xizmati.

Xalqaro ko‘rgazma o‘z ishini davom ettiradi.