Yillar davomida yurtimizda kamba­gʻallik masalasi deyarli tilga olinmagan, mavzu yopiq boʻlgan. Keyingi yillarga ke­libgina, bu masala ochiq muhokamalarga olib chiqildi va uni bartaraf etish boʻyicha tub islohotlar boshlandi. Ushbu toifadagi oilalarni kambagʻallikdan chiqarish, bar­qaror daromad manbaiga ega qilish, kasbga oʻrgatish, tadbirkorlikka yoʻnaltirish va manzilli koʻmakni yoʻlga qoʻyish kabi ish­lar “Kambagʻallikdan farovonlik sari” dasturiga asosan amalga oshirilmoqda.

Joriy yil 19-noyabr kuni Prezidenti­miz raisligida kambagʻallikni qisqarti­rish hamda aholi bandligini taʼminlash borasidagi ishlar sarhisobi va kelgusi yil uchun ustuvor vazifalar yuzasidan oʻtkazilgan videoselektor yigʻilishda ham kambagʻallik­ni qisqartirish yoʻnalishidagi ishlar chuqur tahlil qilindi va kechiktirib boʻlmaydigan yangi vazifalar belgilandi. Aslida, kamba­gʻallik va ishsizlik faqat qiynalgan oila­larning emas, balki jamiyatimizda yashayotgan barchaning umumiy tashvishidir.

Ushbu maqola qahramonlari ham yangi Oʻzbekistonda kechayotgan islohotlar samara­si tufayli hayot qiyinchiliklarini yengib, nafaqat kambagʻallikdan chiqish, balki el- yurtga nafi tegayotgan tadbirkorlarga aylangan zamondoshlarimizdir.

ENDI HAM YERLI, HAM UYLIMAN

Komila JOʻRAYEVA

Jizzax viloyati Zarbdor tumani:

— Yillar mobaynida 7 farzandim bilan boshpanasiz, tashlandiq joyda chayla qurib yashadik. Baʼzan yeyishga non topolmay, pro­piskam yoʻqligi uchun farzandlarimni mak­tabda oʻqita olmay, juda tushkun kayfiyatda yurgan vaqtlarimda kun kelib, meni “Gulchi opa” deb atashlarini xayolimga ham keltir­magandim. Chunki 6 yil oldin “Temir daf­tar”da roʻyxatda turar, ahvolim nochor edi.

Bugungi kunda Zarbdor tumanidagi “Zarb­dor zirapchasi gul koʻchatlarini yetishtirish tomorqa xizmati” MCHJ direktoriman, 35 nafar doimiy ishchim bor. Oʻtgan yili “Yil ayoli” tanlovi respublika bosqichida ishti­rok etib, “Yilning eng jonkuyar ayoli” no­minatsiyasida gʻolib boʻldim. Joriy yil av­gustida esa Prezidentimiz farmoni bilan “Faol tadbirkor” koʻkrak nishoniga munosib koʻrildim.

Hozirgi yashab turgan joyimiz, tomorqa xoʻjaligimiz ilgari tashlandiq, taqir yer edi. Aynan shu yerga kelib, kichik bir kapa ti­kib yashaganmiz. Turmushdagi qiyinchiliklar, tushunmovchilik va aldovlar tufayli far­zandlarim bilan uysiz, koʻchada qolganmiz. Holing qanday kechyapti, bolalaring nima yeb, nima ichyapti, kiyishga kiyimi, yotarga joyi bormi, nega ayol boshing bilan koʻchada yashayap­san, qishning izgʻirini, yozning jaziramasi­da bu yerda qanday jon saqlaysizlar deb soʻ­raydigan odam boʻlmagan.

Beadad shukrki, soʻnggi yillarda yurti­mizda kechayotgan yangilanishlar bois, roʻshno­lik koʻrdim. Hech kutmaganim holda hayotim­da yaxshi oʻzgarishlar roʻy berdi. Buning uchun Prezidentimizdan cheksiz minnatdorman!

Olti yil oldin oʻsha vaqtdagi tuman ho­kimi kelib yashash tarzimni koʻrdi, “Nega bunday ahvolda yashab yuribsiz, farzandla­ringiz maktabda oʻqimayotgan ekan, nima uchun mahallaga yoki bizga murojaat qilmadingiz, mahalla faollari ahvolingizni soʻramadi­mi?” degan savollarni berdi.

Indamadim. Zero, yillar davomida yordam soʻrab men taqillatib bormagan idora eshigi, koʻmaklashing, ahvolim ogʻir deya aytmagan mu­tasaddi rahbar qolmagandi. Shuning uchunmi, oʻsha paytlarda hech kimdan koʻmak soʻrama­ganman. Hokimning “Sizga nima yordam qi­laylik?” degan soʻroviga, “Menga yer bering, mehnat qilib, oʻzim oyoqqa turaman”, dedim. Shundan soʻng yer ajratib berildi.

Davlatimiz koʻmagi bilan issiqxona qurdik, bolalarim bilan asta-sekin issiq­xonalarni koʻpaytirdik. Tumanda gulchilik yoʻnalishida doimiy faoliyat yurituvchi birorta tadbirkor yoʻqligi bois, bu soha­ga ehtiyoj bor edi. Yaqinda quduq qazdirib, suv chiqardik. Ungacha ekinlarni chelaklab suv tashib sugʻorardim. Vaqt oʻtib, yon-at­rofni obod qilib, mevali koʻchatlar ekdim. Davlatimizning yana bir moddiy qoʻllovi bilan ikki xonali uy uchun boshlangʻich toʻ­lov qildim.

Aslida, turmush qiyinchiliklaridan or­tib 7 farzandni tarbiyalash, voyaga yetkazish­ning oʻzi boʻlmaydi. Hayotim asta-sekin izga tushdi, qiyinchiliklar ortda qoldi. Hozir mutasaddi rahbarlar faoliyatimni doim qoʻllab, koʻmak berib kelyapti. Kadastr qi­lish, issiqxonani gazlashtirish orqali fao­liyatim ancha rivojlandi.

Bugun yangi Oʻzbekistonimizda yangila­nishlar nafasi esyapti. Insonparvar, taraq­qiyparvar islohotlar hisobiga men kabi uysiz, ishsiz, boshpanasiz odamlar hayotida olamshumul yaxshi oʻzgarishlar roʻy bermoqda.

Aytgancha, korxonamiz 2022-yilda fao­liyat boshlagan boʻlsa, 2025-yil boshida 100 million soʻm kredit evaziga yana 5 gek­tar yer olib, manzarali gul koʻchatlari yetish­tirishni boshladik. Hozir gullarning 500 xildan ziyodini yetishtiryapman. Issiqxona­larni kengaytirib, gulchilikdan tashqari turli mevali daraxtlar yetishtirish va ichki bozorda sotish, koʻkat va rezavorlarning urugʻini qadoqlab, savdo qilishni yoʻlga qoʻydim. Bundan tashqari, parrandachilik va chorvachilikni ham izga tushiryapman.

Ishsiz xotin-qizlarga tomorqachilik sirlarini oʻrgatish orqali doimiy daromad manbaiga ega boʻlishida koʻmak berish bilan birga ularning maʼnaviy olamini boyitish uchun “Zirapcha” nomli kutubxona tashkil qildim.

Toʻgʻrisi, davlatimiz yaratib berayotgan im­koniyatlar orqali 40 yoshimda kambagʻallikdan chiqib, tadbirkor ayolga aylandim. Asosiysi, farzandlarim oliy taʼlim muassasalarida, kichiklari maktabda oʻqiyapti. Davlatimiz gʻamxoʻrligi va qoʻllab-quvvatloviga javoban ehtiyojmand oilalar, qiynalgan ayollarga koʻ­mak berishga harakat qilyapman.

TAQDIRNING MENGA BERGAN INʼOMI

Narzullo ZABIXULLAYEV

Toshkent viloyati Zangiota tumani:

— Mahallamizdagi hokim yordamchisining koʻmagi va qoʻllab- quvvatlovi tufayli nafaqat oʻzim, balki oila aʼzolarimning hayoti ham yaxshi tomonga oʻzgardi, ogʻir xastalikdan forigʻ boʻldim. Balki bu taqdirning menga bergan inʼomidir.

Yillar davomida otamning qorovullik­dan topgan ish haqi hisobidan kun kechir­ganmiz. Oilamizda 6 kishimiz, barchamiz birgina otamning maoshiga koʻz tikib yashar­dik. Inson hayoti bir yilda emas, bir lah­zada oʻzgarib ketadi deyishsa ishonmasdim. Yoʻqchilik, yetishmovchilikda yashashni davom ettirish mumkin emasligini, nimadir qili­shim kerakligini oʻylardim-u, ishni nimadan boshlashni bilmasdim.

Bir yoqda shifokorlar qoʻygan ogʻir tash­xis, ikkinchi tomonda qoʻlimiz kaltaligi. 2024-yilda mahallamizdagi hokim yordamchi­si xonadonimizga keldi. Bolaligimdan dizayn sohasiga qiziqqanim bois, turli andozalarni chizib oʻtirgandim. Hokim yor­damchisi chizmalarimni koʻzdan kechirar ekan, nega ishlamasligimni soʻradi. “Betobman, onkologik kasallik bilan ogʻriganman”, dedim. U meni malakali shifokorlarga olib borishini aytdi.

Bir necha kundan soʻng shifoxonaga bordik, qayta tekshiruvlardan oʻtdik. Xullas, sogʻli­gʻim tiklana boshladi.

Oz fursat oʻtmay, oilaviy tadbirkor­lik dasturi doirasida xonadonimizda bichuvchilik xizmati bilan shugʻullanishga bankdan 33 million soʻm imtiyozli kre­dit oldim. Dastlab ishimni yakka tadbir­kor sifatida boshlagan boʻlsam, hozir 20 ishchi-xizmatchi bilan davom ettiryapman. Ularning bir qismi kambagʻal oilalar aʼzolari.

Kichik tadbirkorligim bugun tibbiyot kiyimlari tikish va bichuvchilikka ixtisos­lashgan oilaviy korxonaga aylandi. Hozir 27 yoshdaman, oylik daromadim 80 million­dan ziyod.

Bundan tashqari, olti sotixli tomorqa­mizda shamshod oʻsimligini yetishtirishni yoʻlga qoʻydik. Donasini 65 mingdan sotamiz, olti oyda 800 dona shamshod yetishtiriladi. Daromadimiz hisobiga xonadonimizni taʼ­mirladik, turmush sharoitimizni yaxshiladik, avtomobil ham oldik. Quvonarlisi, singlim va ukamni turli toʻgaraklarda oʻqityapman.

Albatta, hayotimdagi bu oʻzgarishlar oʻz- oʻzidan boʻlmadi. Yangi Oʻzbekistonni barpo etish yoʻlidagi islohotlar barcha jabhadagi yangilanishlar, katta-katta yutuqlar, biz kabi millionlab insonlar taqdiri yaxshi tomon­ga oʻzgarishiga asos boʻlyapti. Buning uchun Prezidentimizdan cheksiz minnatdorman!

HAMMASI IZGA TUSHDI, UMIDIM QAYTA TIKLANDI

Shohista NURMAMATOVA

Buxoro viloyati Qorakoʻl tumani:

— Turmush oʻrtogʻim va bir bolam nogiron. Shu bois, roʻzgʻorning kam-koʻstini toʻldi­rishga harakat qilardim. Ayniqsa, birinchi guruh nogironi boʻlgan oʻrtancha farzandim­ning parvarishi, dorilari va kundalik eh­tiyojini taʼminlash eng ogʻir sinovlardan biri edi. Voyaga yetmagan uch bolaning kunda­lik xarajatlari ham bunga qoʻshilib, uzoq yillar tinkamni quritdi.

Yaxshiyam orzu bor. Bu kunlar kelishini yillar boʻyi kutib, niyat qilib yashadim. Yoʻq­sa, bilmadim, turmushning bu ogʻir sinov­lariga qanday bardosh berardim? Har holda hayotim qachondir oʻnglanishini bilardim.

Shukrki, oʻylaganlarim, yaxshi niyatlarim roʻyobga chiqmoqda. Davlatimiz xalqimizni, yurtdoshlarimiz davlatimizni qoʻllashi or­tidan mamlakatimiz tez rivojlanyapti. Yaʼni bugun barchaga tadbirkorlik, ish, oʻqish, sport uchun yaxshi sharoit yaratib berilyaptiki, un­dan unumli foydalanayotganlarning yutugʻi yigʻilib, Oʻzbekistonimizni har tomonlama yuksaltirmoqda. Asosiysi, “Inson qadri uchun” gʻoyasiga asoslangan ustuvor islohot­lar tufayli biz kabi ehtiyojmand qatlam va­killari ham oʻzini baxtli his qilmoqda.

2022-yilda “Temir daftar”ga kiritil­dim. 2023-yilda “Mahalla yettiligi” yordami bilan oilaviy tadbirkorlikni boshlash uchun 33 million soʻm imtiyozli kredit oldim. Ishni tovuq boqish hamda tuxum sotishdan boshladim. Bu ishning xarajati kam, asosiy ishlar esa uyda bajariladi. Shu bois, ham ishlash, ham farzandlarim va turmush oʻr­togʻimga gʻamxoʻrlik qilishga vaqtim koʻproq boʻladi.

Mehnatda baraka bor deyishadi. 300 ta tovugʻim bor edi, hozir ularning soni ikki mingtaga yetdi. Har kuni qariyb 1000 dona tuxum olaman. Xaridorlar tuxumni uyimdan olib ketadi.

2024-yil kuzida yana 100 million soʻm kre­dit olib, ishlab chiqarish koʻlamini kengay­tirdim. Endi parrandachilik asosiy daro­mad manbaimizga aylandi.

Turmush qiyinchiliklari meni baʼzan butunlay yolgʻiz qoldirgandek tuyular, hayotda qanday yoʻl topaman, farzandlarimni qanday qilib oyoqqa turgʻizaman degan oʻylar bilan tunlari bedor oʻtirardim. Shukrki, davlatimizning yordami, eʼtibori orqali hayotim izga tushdi, umidim qayta tiklandi.

Hayotimdagi bu katta oʻzgarishlar uchun davlatimizdan bir umr minnatdorman. Prezidentimizning gʻamxoʻrligi tufayli qaytadan qaddim tiklanib, jamiyatda oʻz oʻr­nimni topdim.

DAVLATIMIZ QOʻLLAB-QUVVATLOVI

BILAN SHU DARAJAGA ERISHDIM

Feruza OCHILOVA

Qashqadaryo viloyati Gʻuzor tumani:

— Yoʻqchilik qursin, qora qozonni qayna­tishdan boshqa tashvish xayolingga kelmaydigan paytda farzandlaring biror tansiq taom pi­shirib yoki yangi kiyim olib berishingni soʻra­sa, gʻalati holga tushib qolarkansan. Soʻragani­ni qilay desang imkoning yoʻq, vaziyatni aytib koyisang, ular bola, tushunmasligi mumkin, boshqa tomondan, ular bu narsalarni soʻrashga haqli. Shunday kezlari javobi yoʻq savolla­rimdan mayus tortardim.

Bunday tushkunlik ruhiyatga ham taʼsir qilarkan. Soʻnggi yillardagi oʻzgarishlar tu­fayli oilaviy sharoitimizni oʻrganib chiqib, “Ayollar daftari”ga roʻyxatga qoʻyishganida aytarli oʻzgarish boʻlishiga ishonmagandim. Mahalla faollari bankdan kredit olishimni tavsiya qildi, ijtimoiy daftarda turganim uchun imtiyoz asosida 30 million soʻm oldik.

Shu asosda tomorqamizda ikki sotixli kichik issiqxona barpo etib, dehqonchilikni yoʻlga qoʻydik. Bu kutganimizdan tezroq nati­ja berganini koʻrib juda ruhlandik. Hozir­ga kelib, qoʻshimcha daromadimiz hisobidan issiqxonani olti sotixgacha kengaytirdik. Yil davomida uch marta hosil yetishtiramiz. Asosan, pomidor va bodringdan barqaror da­romad olyapmiz. Yana chorvachilikni ham yoʻlga qoʻydik.

Daromadimiz yaxshi, shuning hisobidan uy-joyimizni taʼmirladik, qoramollarni koʻpaytirdik. Farzandlarimizni oliy taʼ­limda oʻqitishni niyat qilganmiz. Davlati­miz qoʻllab-quvvatlovi bilan shu daraja­ga yetishdim. Fikrimcha, bu yoʻnalishdagi siyosat evaziga Oʻzbekistonda menga oʻxshab muhtojlikdan farovonlikka chiqqanlar, tadbirkor boʻlib el-yurt manfaati yoʻli­da xizmat qilayotganlar juda koʻp. Shuning uchun mamlakatimiz juda tez surʼatlarda rivojlanyapti.

Demoqchimanki, davlatimiz mana shunday sharoit yaratib bergan ekan, biz bu ishonch, ragʻbat fursatini imkoniyatga aylantirib, ham oilamiz, ham yurtimiz barqarorligi yoʻ­lida bor kuch-gʻayratimizni ishga solishimiz talab etiladi. Shaxsan oʻzim bu talabni sha­raf bilan bajaraman.

* * *

Bugun “Kambagʻallikdan farovonlik sari” dasturi natijasida xalqimiz turmush tarzida yangi imkoniyatlar, yangi sahifalar ochilmoqda. Keng qamrovli islohotlar har bir hududda oʻzi­ning aniq natijasini bermoqda.

Qaysi hududga bormang, tomorqadan unumli foydalanish, issiqxona xoʻjaliklari, gulchi­lik va kichik biznesning turli yoʻnalishlarini rivojlantirayotgan fidoyilarga duch kelasiz. Ular nafaqat oʻz oilalariga mustahkam tayanch, balki mahalla hayotiga yangi ruh va harakat ba­gʻishlayotgan yangi davr ishbilarmonlaridir.

Ulardan bir guruhining hayoti bilan tanishar ekanmiz, imkoniyatlardan unumli foydala­nish asnosida kambagʻallikdan chiqib, munosib hayot darajasiga erishganining guvohi boʻla­miz. Ularning har biri iroda, mehnat va intilish bilan roʻzgʻoriga baraka, hayotiga esa goʻzal maqsadlar kirita olgan.

Ha, insonning farovon, toʻkin va xotirjam hayot kechirishi, avvalo, uning oʻzidagi iroda va halol mehnatiga bogʻliq. Xonadonida tinchlik, mehnatida baraka boʻlishini istagan har bir inson bugungi islohotlardan unumli foydalangan holda oʻz saʼy-harakatlari bilan toʻkin va toʻkis hayotga erishishi mumkin.

Gulichehra DURDIYEVA,

“Yangi Oʻzbekiston” muxbiri