Turki Al ash-Sheyx boshchilishidagi tashkilotchilar 2025-yilning 22-fevral kuniga belgilangan ushbu katta boks oqshomining rasmiy posterini ham eʼlon qildi.
Markaziy jang Artur Beterbiyev va Dmitriy Bivol oʻrtasida tashkil etiladi. Bu revansh maqomidagi jang boʻladi. Ilk jangda Beterbiyev hakamlar qaroriga koʻra gʻalaba qozongan va bu eʼtirozlarga sabab boʻlgandi. Turki Al ash-Sheyx eʼtirozlarga javoban tezda revansh jangini tashkil qilmoqda.
Biz uchun ahamiyatlisi, Isroil Madrimov Ar-Riyoddagi yulduzli boks oqshomida oʻzining yana bir katta jangini oʻtkazadi. Hamyurtimiz amerikalik mashhur bokschi, birinchi oʻrta vazn toifasida vaqtinchalik WBC chempioni Verjil Ortisga qarshi ringga koʻtariladi. Bu jangning tashkil etilishi haqida avvalroq xabar berilgandi. Kecha tunda bu rasman oʻz tasdigʻini topdi.
Shuningdek, Saudiyadagi boks oqshomida superogʻir vazn toifasida amaldagi IBF chempioni britaniyalik Daniel Dyubua sobiq WBO chempioni Jozef Parkerdan kamarini himoya qiladi.
