Ar-Riyod shahrida Oʻzbekistonning Saudiya Arabistonidagi elchixonasi koʻmagida boʻlib oʻtayotgan COP16 konferensiyasi doirasida mezbon davlat shartnomasini imzolash va Xalqaro tabiatni muhofaza qilish ittifoqining (IUCN) Toshkent shahrida vakolatxonasini tashkil etish marosimi boʻlib oʻtdi.
Hujjatni Ekologiya, atrof-muhitni muhofaza qilish va iqlim oʻzgarishi vaziri Aziz Abduhakimov va IUCN bosh direktori Gretel Agilar imzoladi.
«IUCN bilan hamkorligimiz qoʻshma loyiha va tadbirlar orqali rivojlanib borayotganidan mamnunmiz. Toshkentda ofisning tashkil etilishi hamkorlik uchun yangi imkoniyatlar yaratishiga ishonaman, — dedi Oʻzbekiston Ekologiya, atrof-muhitni muhofaza qilish va iqlim oʻzgarishi vaziri Aziz Abduhakimov. — Ekologik muammolar chegara bilmaydi, bu esa kuchlarni birlashtirish va transchegaraviy hamkorlik muhim ekanligini anglatadi. IUCNning Toshkentdagi vakolatxonasi nafaqat Oʻzbekistonga, balki butun Markaziy Osiyo mintaqasiga xizmat qilib, tabiatni muhofaza qilish va barqaror rivojlanish sohasida mintaqaviy hamkorlikni rivojlantirishidan mamnunmiz».
Bitim IUCNning Oʻzbekistondagi faoliyati uchun huquqiy asos boʻlib, uzoq yillik hamkorlikdagi muhim bosqichni belgilab beradi. Respublika Ittifoqqa 2021-yilda aʼzo boʻldi. Hujjat davlat organlari bilan yanada samarali hamkorlikni taʼminlaydi hamda IUCNning Oʻzbekiston va mintaqani tizimli va samarali rivojlantirishga qoʻshayotgan hissasini qoʻllab-quvvatlaydi.
«Biz Oʻzbekiston bilan hamkorligimizni mustahkamlaydigan hamda mamlakatda va butun Markaziy Osiyoda atrof-muhit va iqlim boʻyicha qoʻshma tashabbuslarga asos soladigan ushbu muhim voqeadan mamnunmiz, – dedi IUCN Bosh direktori Gretel Agilar. – Vazirlik va boshqa hamkorlar bilan tabiatni muhofaza qilish, ekotizimni tiklash va iqlim oʻzgarishi oqibatlarini yumshatish boʻyicha yaqindan hamkorlik qilishni orziqib kutamiz. IUCN bizga mintaqaning noyob biologik xilma-xillik va qimmatli tabiiy resurslarni muhofaza qilish boʻyicha saʼy-harakatlariga yanada salmoqli hissa qoʻshish imkoniyatini taqdim etgani uchun Oʻzbekistonga samimiy minnatdorlik bildiradi».
IUCN va Ekologiya vazirligi oʻrtasidagi hamkorlik samarali saʼy-harakatlarga yoʻl ochadi. Hamkorlik loyihalari qatoriga IUCN, Global ekologik fond (GEF) va Birlashgan Millatlar Tashkilotining Oziq-ovqat va qishloq xoʻjaligi tashkiloti (FAO) bilan hamkorlikda boshlangan IUCN Mintaqaviy yagona sogʻliqni saqlash tashabbusi hamda Landshaftlar va yerlarni tiklash loyihasi kiradi.
Yaqin kelajakda GEF va BMT Taraqqiyot dasturi bilan hamkorlikda tashkil etilgan Oʻzbekistonda tabiatni muhofaza qilish va alohida qimmatli landshaftlarni tiklashni kompleks boshqarish loyihasini ishga tushirish orqali hamkorlikni kengaytirish rejalashtirilgan.
Ushbu loyihalar dolzarb ekologik muammolarni hal qiladi va insoniyat va tabiat manfaati uchun innovatsion, keng koʻlamli yechimlarni roʻyobga chiqaradi.
