Maʼlum qilinishicha, Meksikada yashovchi 59 yoshli erkak, kasallik alomatlari paydo boʻlishidan oldin uch hafta davomida yotoqda yotgan. Shu yilning 17-aprel kuni esa u isitma, nafas qisilishi, ich ketishi, koʻngil aynishi kabi alomatlar bilan tez yordamga murojaat qilgan.

Oradan bir hafta oʻtgach, u Milliy nafas olish kasalliklari institutiga yotqizilgach, oʻsha yerda vafot etdi.

Uning oʻlimidan soʻng, sogʻliqni saqlash idoralari marhumdan olingan namunalarni sinovdan oʻtkazdi. 8-may kuni Yuqumli kasalliklarni tadqiq qilish markazining Rivojlanayotgan kasalliklar molekulyar biologiyasi laboratoriyasi bemorda A(H5N2) grippi uchun namuna musbat ekanini maʼlum qildi.

JSST bu dunyo miqyosida qayd etilgan parranda grippining A(H5N2) kichik turi bilan kasallangan odamning laboratoriya tomonidan tasdiqlangan birinchi holati va Meksikada qayd etilgan birinchi H5 infeksiyasi ekanini maʼlum qildi. Taʼkidlanishicha, jabrlanuvchida parranda yoki boshqa hayvonlarga taʼsirchanlik mavjud boʻlmagan.

Shuningdek, Meksikadagi qushlarda ham H5N2ning bir nechta epidemiyasi qayd etilgan, shu jumladan, Meksika shtati bilan chegaradosh Michoakan shtatidagi hovlidagi parrandachilik fermasida ham ushbu epidemiya aniqlangan.

Bundan tashqari, Meksika shtatidagi ikkita munitsipalitetda past patogenli parranda grippining (LPAI) A(H5N2) ikkita epidemiyasi qayd etilgan. Biroq bu kabi kasallikning odamda uchrashi yaqinda parrandachilik epidemiyasi bilan bogʻliqmi yoki yoʻq, buni aniqlash mumkin emas.