Unda Qoraqalpog‘istondagi ommaviy axborot vositalari xodimlari, jumladan, ustoz jurnalistlar, internet nashrlari masʼullari va muxbirlari, blogerlar, hokimliklar axborot xizmati rahbarlari, shuningdek, Toshkent shahri va Xorazm viloyatidan kelgan media tuzilma hamda jamoatchilik vakillari, talaba-yoshlar ishtirok etdi.
Qoraqalpoq davlat universitetining Yoshlar masalalari va maʼnaviy-maʼrifiy ishlar bo‘yicha birinchi prorektori Saxabatdin Alauatdinov olib borgan konferensiyada O‘zbekiston Jurnalistlar uyushmasi raisi v.b. Xolmurod Salimov Prezidentimiz Shavkat Mirziyoyev rahbarligida Qoraqalpog‘istonda aholiga qulaylik yaratish bo‘yicha amalga oshirilayotgan keng ko‘lamli ishlar, mamlakatimizda milliy jurnalistikani rivojlantirish bo‘yicha hayotga tatbiq etilayotgan islohotlar samaralari, ayni kunda soha vakillari oldida turgan dolzarb vazifalar xususida so‘z yuritdi.
“Ijtimoiy tarmoqlarda dezinformatsiya va misinformatsiya masalasi: ularga qarshi qanday kurashish mumkin?”. Ushbu mavzu bo‘yicha “Yangi media taʼlim markazi” direktori, filologiya fanlari doktori Beruniy Alimov maʼruza qildi. U zamonaviy ko‘rgazmali vositalar orqali dezinformatsiya va misinformatsiya atamalariga izoh berdi. Maʼlum qilinganidek, Misinformatsiya – yolg‘on, to‘liq va aniq bo‘lmagan, soxta axborot, ammo zarar yetkazishga qaratilmagan xabar; dezinformatsiya esa – biror shaxs, ijtimoiy guruh, maʼlum bir tashkilotga, mintaqaga, mamlakatga qasddan zarar yetkazuvchi yolg‘on axborot.
Anjumanda internet va ijtimoiy tarmoqlardan foydalanish jadal rivojlanayotgan hozirgi zamonda dezinformatsiya va misinformatsiya masalasi kun tartibiga chiqqanligi, ularga qarshi samarali kurashish yo‘llari haqida atroflicha maʼlumotlar berildi.
Konferensiyada “Qoraqalpog‘iston tongi” gazetasi bosh muharriri Nazira Matyoqubova joylarda bo‘layotgan voqea-hodisalarni xolis-haqqoniy, adolatli yoritish, matbuot va so‘z erkinligi, kasb etikasi talablariga rioya qilish masalalari, so‘z masʼuliyati, sohamiz oldida turgan mavjud kamchiliklar va ularning yechimlari haqida maʼruza qildi.
Erkin muloqot tarzida o‘tgan tadbirda Qoraqalpoq davlat universitetidan — filologiya fanlari doktori, dotsent Ziyada Kojikbayeva, filologiya fanlari doktori, dotsent Tamara Masharipova, Qoraqalpoq filologiyasi va jurnalistika fakulteti talabalari Sitora Axmetova, Najimatdin Allasugurov va boshqalar mavzu yuzasidan o‘z fikr-mulohazalarini, taklif va tavsiyalarini bildirdi.
O‘zbekiston Jurnalistlar uyushmasi
Axborot xizmati
