Keyingi yillarda ushbu sanʼat turini keng ommalashtirishga alohida eʼtibor qaratilmoqda.
Jumladan, Prezidentimizning 2022-yil 2-fevraldagi “Madaniyat va sanʼat sohasini yanada rivojlantirishga doir qoʻshimcha chora-tadbirlar toʻgʻrisida”gi qarori ijrosini taʼminlash, yosh isteʼdodlarni izlab topish va qoʻllab-quvvatlash maqsadida Andijon shahrida “Kelajak” bolalar folklor jamoalari respublika festivaliga start berildi.
Festival xalq ogʻzaki ijodi namunalaridan “Lapar”, “Yalla”, “Oʻlan”, baxshichilik sanʼati, urf-odat va anʼanalarimizni ulugʻlovchi oʻyinlar, raqs, qoʻshiq, musiqa ijrochiligi yoʻnalishlarini qamrab olgan.
Asosiy maqsad bolalar folklor sanʼatini rivojlantirish, sheʼriy ijodiyot, xalq dostonlari, hunarmandchilik, milliy liboslar va xalq oʻyinlari, urf-odatlarni saqlab qolish hamda ularni keng targʻib etish, milliy anʼanalarni asrab-avaylashdan iborat.
