Bu haqda Newsweek va NK News nashrlari Janubiy Koreya Mudofaa tadqiqotlari instituti (KIDA) hisobotiga tayanib xabar beradi.
Hisobotda aytilishicha, Shimoliy Koreya 19,2 milliard dollarlik asbob-uskunalar va o'q-dorilar yetkazib berishdan eng ko'p daromad ko'rgan. Pxenyan, shuningdek, texnologiya yetkazib berishdan 630 million dollar va qo'shin yuborishdan 280 million dollar daromad ko'rgan.
Janubiy koreyalik tadqiqotchilar o'z hisob-kitoblari uchun KXDR Rossiyaga faqat dengiz orqali 21 ming konteyner qurol va o'q-dorilar jo'natgani haqidagi ma'lumotdan foydalangan.
Institut Shimoliy Koreya qo'shinlarini joylashtirishdan olingan foydani Rossiya KXDRdagi 11 ming askarga oylik maosh, shuningdek, bir martalik bonus to'lashi haqidagi ma'lumotlar asosida hisoblab chiqdi. Hisobotda qayd etilishicha, Pxenyan bu to'lovlardan pulning bir qismini harbiylarga jo'natishdan oldin o'zida ushlab turadi.
Reuters ma'lumotlariga ko'ra, so'nggi oylarda Rossiya harbiylari qo'llagan o'q-dorilarning 50 foizga yaqini KXDRdan yetkazib berilgan.
Shimoliy Koreya, Ukraina, Janubiy Koreya va AQSh ma'lumotlariga ko'ra, Rossiya-Ukraina urushida qatnashish uchun Rossiyaga 11-12 ming askar yuborgan. Kursk viloyatidagi janglarga KXDR harbiylari jalb qilingan. Yanvar oyida Ukraina Prezidenti Vladimir Zelenskiy Shimoliy Koreyaning to'rt mingga yaqin askari halok bo'lgan va yaralanganini aytgan edi. Shimoliy Koreyaning yo'qotishlari haqidagi xuddi shunday hisob-kitoblarni hozirda Janubiy Koreya Birlashgan shtab boshliqlari qo'mitasi ham taqdim etdi, deb xabar beradi meduza.io.
