Maʼlum qilinishicha, bir guruh shaxslar Tashqi mehnat migratsiya agentligi, xususiy bandlik agentliklarining sobiq mansabdorlari va boshqalar bilan uyushgan holda fuqarolarni Koreyaga ishga yuborishni vaʼda qilgan.

Dastlabki maʼlumotlarga koʻra, jinoyiy guruh 35 nafar fuqarodan jami 263,5 ming AQSH dollarini nokonuniy ravishda olgan.

Tergov jarayonida Koreyaga ishga yuborish uchun rasmiy toʻlovlardan tashqari fuqarolardan firibgarlik yўli bilan 7 mingdan 12 ming AQSH dollarigacha pul yigʻilgani maʼlum boʻldi.

Shuningdek, guruh 230 nafar fuqaroni Koreyaga yuborish evaziga 580 ming dollar, Koreyaga yuborilgan 1 ming nafar fuqarodan esa nokonuniy tarzda 5,6 million dollar olgani aniqlangan. Tergov maʼlumotlariga koʻra, umumiy nokonuniy mablagʻlar miqdori 45 million AQSH dollariga etgan.

Hozirda Koreyaga yuborilmagan 600 nafardan ortiq fuqaroning murojaatlari oʻrganilib, etkazilgan zarar miqdori aniqlanmoqda va undirish choralari koʻrilmoqda.

Mazkur holat yuzasidan jinoyat ishi qoʻzgʻatilgan boʻlib, tergov harakatlari davom etmoqda.

Bosh prokuratura jabrlangan fuqarolardan Departamentning 71-233-10-07 raqamli ishonch telefoni orqali murojaat qilishni soʻradi.