Oʻzbekiston Yoshlari umumjahon assotsiatsiyasining Koreya Respublikasidagi vakolatxonasi bilan hamkorlikda uyushtirilgan mazkur tadbirda ushbu mamlakatda faoliyat yuritayotgan vatandoshlarimiz, Xanguk chet tillari universitetida oʻzbek tili yoʻnalishi boʻyicha tahsil olayotgan mahalliy talabalar ishtirok etdi.
Tadbirda Zahiriddin Muhammad Bobur hayoti va beqiyos adabiy-ilmiy merosi haqida soʻz bordi. Xususan, buyuk bobokalonimiz tomonidan yaratilgan nodir, bebaho ilmiy asarlarning jahon taraqqiyoti, ilm-fani rivojidagi ahamiyati, ilmiy salohiyati, insoniyat tafakkurining, xalqimiz, ayniqsa, yosh avlod maʼnaviyatining yuksaltirishdagi oʻrni va roli nihoyatda muhim ekanligi taʼkidlandi. Bobur hayoti va ijodi, oʻlmas asarlari, boburiylarning Hindiston taraqqiyotidagi oʻrni va roli alohida qayd etildi.
Boburning betakror sheʼriyati, Sharq xalqlarining turmush tarzi, urf-odatlari, tabiati va qadriyatlari haqida mufassal maʼlumot beruvchi, insonni komillikka undovchi asarlari yosh avlodni Vatanga muhabbat, istiqlol gʻoyalariga sadoqat ruhida tarbiyalashda muhim ahamiyatga egaligi aytildi.
Tadbir ishtirokchilari Oʻzbekistonda buyuk alloma va mutafakkirlarning ijodiy merosini oʻrganish, xotirasini abadiylashtirish, asarlarida ilgari surilgan ezgu gʻoyalarni keng targʻib etishga alohida eʼtibor qaratilayotganini taʼkidladi.
Tadbirda vatandoshlarimiz va Janubiy koreyalik talabalar Zahiriddin Muhammad Bobur ijodidan namunalar oʻqib berdi, deb xabar beradi “Dunyo” AA.
