Falastin Prezidenti Mahmud Abbos G'azo sektorini poytaxti Sharqiy Quddus bo'lgan yagona davlat doirasida G'azo sektorini arab va xalqaro ko'mak bilan birlashtirishga chaqirdi.
“G'azo sektori ustidan suverenitet Falastin davlatiga tegishli va uning Iordan daryosining G'arbiy Sohili bilan aloqasi Falastin qonunlari va davlat institutlari orqali tiklanishi kerak”, dedi siyosatchi WAFA axborot agentligi tomonidan tarqatilgan bayonotda. Uning qo'shimcha qilishicha, Ramallahda hukumat tomonidan tuzilgan Falastin ma'muriy qo'mitasi “birlashgan Falastin xavfsizlik kuchlarining qo'llab-quvvatlashi bilan G'azo sektorini boshqarishni o'z zimmasiga olishga tayyor”.
Mahmud Abbos AQSh Prezidenti Donald Tramp va barcha vositachilarning G'azodagi urushni to'xtatish, Isroil qo'shinlarini sektordan olib chiqish, aholiga gumanitar yordam ko'rsatishni kengaytirish va asirlarni almashish bo'yicha kelishuvga erishish borasidagi sa'y-harakatlarini yuqori baholadi. “Umid qilamanki, bu sa'y-harakatlar Isroil bosqiniga barham beradigan va 1967-yil 4-iyundagi chegaralarda poytaxti Sharqiy Quddus bo'lgan mustaqil Falastin davlatini barpo etishga olib keladigan siyosiy kelishuvga erishish uchun debocha bo'ladi”, dedi Mahmud Abbos.
Avvalroq AQSh Prezidenti Donald Tramp Isroil va HAMAS vakillari Misrdagi muzokaralar yakunlari bo'yicha tinchlik rejasining birinchi bosqichi bo'yicha kelishuvga erishganini ma'lum qilgandi. Uning ta'kidlashicha, bu bosqich barcha garovga olinganlarni “imkon qadar tezroq” ozod qilish va Isroil qo'shinlarini G'azo sektori ichidagi kelishilgan chiziqqa olib chiqishni nazarda tutadi. Trampning aytishicha, “bardoshli, mustahkam va abadiy tinchlik sari” birinchi qadamlar tashlangan.
29-sentabr kuni Oq uy Trampning G'azo sektoridagi mojaroni hal qilishga qaratilgan “keng qamrovli rejasi”ni e'lon qildi. 20 banddan iborat hujjat boshqa jihatlar qatori Falastin anklavida vaqtinchalik tashqi boshqaruvni joriy etish va xalqaro barqarorlik kuchlarini joylashtirishni talab qiladi. Isroil bu rejaga roziligini e'lon qildi. HAMAS G'azoda garovga olingan barcha tirik isroilliklarni ozod qilishga va o'lganlarning jasadlarini topshirishga tayyorligini bildirdi, deb xabar berdi tass.ru.
