Maktabgacha va maktab taʼlimi vazirligi 16 yoshga toʻlgan maktab bitiruvchilaridan oʻz vaqtida pasport olishni soʻradi.
Qayd etilishicha, abituriyentlarning OTMga kirish uchun tegishli hujjatlarni onlayn topshirish jarayonida bitiruvchilarning pasport (ID karta) maʼlumotlarini ABITUR elektron dasturiga kiritish talab etiladi.
Shuning uchun 16 yoshga toʻlgan har bir bitiruvchi oʻz vaqtida pasport (ID karta) olishi zarurligi qayd etilgan.
Ushbu jarayonda bitiruvchilarga yanada qulaylik yaratish maqsadida Maktabgacha va maktab taʼlimi vazirligining elektron maʼlumotlar bazasi Bilim va malakalarni baholash agentligining ABITUR elektron dasturi bilan integratsiya qilingan.
Bugungi kunga qadar joriy oʻquv yilida maktablarni tamomlayotgan 450 mingdan ortiq oʻquvchining 16 yoshga toʻlgan 23 ming (5,1%) nafari pasport (ID karta) olmaganligi sababli ularning pasport maʼlumotlari elektron bazaga hozircha kiritilmagan.
«Hurmatli ota-onalar, aziz bitiruvchilar! Farzandingizning Konstitutsiyaviy huquqidan foydalangan holda, oʻz vaqtida pasport (ID karta) olishini taʼminlashingizni, maktab maʼmuriyatidan esa bitiruvchilarning pasport (ID karta) maʼlumotlarini elektron bazaga kiritib, ularni kelgusida oliy taʼlim muassasalariga hujjat topshirishida zarur koʻmak berishingizni soʻraymiz«, — deyiladi xabarda.
