Hisob-kitoblarga koʻra, yer usti metro liniyalari ostidagi foydalanilmayotgan yerlarning umumiy maydoni 100 ming kvadrat metrni tashkil etadi.

Mazkur joylarning kamida 50 foizi tadbirkorlar uchun qoʻshimcha daromad nuqtasiga aylanishi va shu orqali aholi farovonligini va hududlardan foydalanish samaradorligini oshirishga xizmat qilishi mumkin.

Taʼkidlanishicha, ilgari bu hududlarda bolalar oʻyin maydonchalari, sayr qilish uchun hududlar yaratilgan boʻlib, ular bolalar, ularning onalari va buvilarining sevimli maskaniga aylangan edi. Qish fasli yaqinlashayotgani munosabati bilan keyinchalik ularda joylashgan doʻkonlar, qahvaxonalar va oʻyin maydonchalari tutash hududlar aholisi uchun yana bir qulay maskanga aylanishi kutilmoqda.

Sinov tariqasida oʻtgan yilning oʻrtalarida 2-metro bekati yaqinida tijorat binolari ochildi. Loyiha muvaffaqiyatli amalga oshirilgach, uni 3 va 4-stansiyalar oraligʻida — aholi zichroq joylashgan hududlarda amalga oshirishga qaror qilindi.

Keyinchalik, birinchi bosqichda “Rohat” aylanma yoʻligacha, ikkinchi bosqichda esa “Rohat” aylanma yoʻlidan “Qoʻyliq” bozorigacha boʻlgan obyektlar tashkil etish rejalashtirilgan.

“Mazkur binolarni sotib olish yoki ijaraga olish narxi turar-joy majmualarining birinchi qavatlaridagi noturarjoy obyektlariga nisbatan “ancha hamyonbop” boʻladi. Bu yerda doʻkon, qahvaxona va oʻyin maydonchalari tashkil etish mumkin”, deyiladi xabarda.