Oʻzbekiston delegatsiyasi Misrdagi yirik “Minafarm” biofarmatsevtika sohasidagi kompaniyasining yuqori sifatli, arzon va talabgir dori mahsulotlarini ishlab chiqarish jarayoni bilan tanishib, uning mavjud imkoniyatlari va salohiyatini oʻrgandi.
Kompaniya rahbariyati bilan oʻtkazilgan muzokaralar chogʻida hamkorlikning istiqbolli yoʻnalishlari muhokama etildi.
Oʻzaro kelishuvga koʻra, mazkur hamkorlikning birinchi bosqichida Misr kompaniyasi mutaxassislarining Oʻzbekiston farmatsevtika bozorini oʻrganish, tahlil qilish va tegishli loyihani tayyorlash maqsadida joriy fevral oyida mamlakatimizga safari uyushtiriladi. Shuningdek, safar davomida Toshkent viloyati “Parkent” erkin iqtisodiy zonasi hududida dori vositalarini ishlab chiqarishni yoʻlga qoʻyish uchun mahalliy ishchilarni yollash va ularning kasbiy malakasini oshirish ishlari tashkil etiladi.
Keyingi bosqichda esa Misr kompaniyasi tomonidan sohaga oid ilgʻor texnologiyalarni taqdim etish, distribyutorlik markazi ochish, ishlab chiqarilgan dori vositalarini mamlakatimizda roʻyxatdan oʻtkazish, mahalliylashtirish, ishlab chiqarish va xorijga eksport qilish bilan bogʻliq vazifalar rejalashtirilgan, deb xabar beradi “Dunyo” AA.
