Uchrashuvda tomonlar mamlakatlarimiz oʻrtasida transport sohasidagi hamkorlik aloqalarini yanada kuchaytirish, turizm, savdo-iqtisodiy munosabatlarni rivojlantirish bilan bogʻliq masalalarni muhokama etdi.
Xususan, tomonlar mamlakatlarimiz oʻrtasida avtomobil transportida yuk tashuvlarini yoʻlga qoʻyish, bunda milliy tashuvchilar uchun qulay sharoitlarni yaratish, ikki davlat oʻrtasida toʻgʻridan-toʻgʻri aviaqatnovlarni tashkil etish orqali yoʻlovchi va yuk tashuvlarini rivojlantirish yuzasidan fikr almashdi.
Mazkur yoʻnalishlarda amaliy natijalarga erishish maqsadida tezkor choralar koʻrilishini har ikki tomon vakillari alohida taʼkidlab oʻtdi. Tomonlar mamlakatlarimiz oʻrtasida transport va logistika yoʻnalishida hamkorlik aloqalarini yangi bosqichga olib chiqish uchun barcha sharoitlar mavjudligini, imkoniyatlardan samarali foydalanish har ikki tomon uchun ham manfaatli ekanligini qayd etdi, deb xabar beradi Transport vazirligi matbuot xizmati.
Uchrashuvda muhokama etilgan hamkorlik yoʻnalishlari doirasida kelgusida amalga oshiriladigan vazifalar belgilab olindi.
